HUMAN sa duha ka mga semana nga ensayo ni pound-for-pound champion Manny Pacquiao, nausab na ang prediksyon ni American trainer Freddie Roach.

Ning higayuna, masaligon na si Roach nga patikangkangon ni Pacquiao si Ghanaian Joshua Clottey karong Marso 13 sa Dallas Cowboys Stadium.

Click here for stories and updates on the Sinulog 2010 Festival.

“Manny will knock him out,” matod ni Roach sa interbyu sa GMA News.

“I’ve been studying tapes of him (Clottey), (and) he’s not very good.”

Sa sayo pa, nagtuo si Roach nga igo lang modaog si Pacquiao pinaagi sa desisyon kay iyang gikonsiderar ang gidak-on ug kalig-on ni Clottey.

Apan human niya nasuta og maayo ang kapabilidad ni Clottey, nakumbinsir si Roach nga ang kusog ug kaabtik ni Pacquiao mao ang labing unang magpatumba kang Clottey.

“I think if we break him (Clottey) down, we can get him out of there in the late rounds,” dugang ni Roach, kansang mga prediksyon nihaom gyud kon giunsa pagmakmak ni Pacquiao sila si Oscar De La Hoya, Ricky Hatton, and Miguel Cotto.

Naobserbahan ni Roach nga haw-ang ang depensa ni Clottey sa bodega ug mao kini ang iyang papunteryahon kanunay ni Pacquiao hangtod nga maluya si Clottey.

Nagtuo si Roach nga kon maluya na si Clottey, hayan kaya na kaayo kining palukapahon ni Pacquiao sa hinapos nga bahin sa away.

Giangkon ni Roach nga nabalaka sab gyud siya sa bintaha ni Clottey sa gidak-on apan alang kaniya, ang abilidad ni Pacquiao mao gyu’y mopatigbabaw.

“It (Clottey’s size) is always a concern, of course. But the thing is, going into the ring, my guy (Pacquiao) is going to be about 149 (lbs) and the other guy will is going to have to be about 10-12 pounds on him and be bigger. But size doesn’t win fights. Ability does!” asoy ni Roach.

Si Pacquiao, 7-division champion, modepensa sa iyang WBO welterweight title batok kang Clottey.