DEAR Noy Tikyo,
Ako diay si Henry, 32 anyos. Nagtrabaho sa usa ka pribadong kompaniya sa Tagum City.
Duna koy karelasyon karon sulod na sa duha ka tuig nga duna na say permanenteng trabaho.
Ang nakahatag nako og suliran karon mao ang akong pamilya kay sa akong obserbasyon wala sila makauyon sa akong girlfriend.
Nagplano na man god mi sa akong uyab nga magminyo na sunod tuig apan nahadlok mi kon unsaon namo pagpananghid sa akong pamilya kay basin og masuko.
Sa bahin sa pamilya sa akong girlfriend, wala nay problema kay nasultihan na namo.
Ambot ba nga nakaila na man unta ang akong pamilya sa akong uyab apan mora og wala man silay gusto niya.
Hinuon, kining akong pamilya, gumikan lagi kay pobre mi, maulawon kaayo. Di mahibawong moabi-abi og mga tawo, ilabi na gyud ang akong ginikanan.
Tungod sa akong pangedaron karon, gusto na gyud unta kong magminyo na. Pero ang akong kabalaka mao ang akong ginikanan. Unsay akong buhaton?
Henry
*****
Henry,
Kinahanglan nga imong sultihan sila sa imong plano karon aron nga masayud ka kon unsa ang ilang baruganan bahin sa imong uyab.
Nasayud ko nga bug-at para sa ginikanan nga magminyo ang anak kay lagi di na nila gunit ang iyang kinabuhi. Apan normal man lang ni nga pagbati alang sa ginikanan, kay sa hinay-hinay ila ra ning madawat.
Tinuod nga naa ka na sa saktong pangedaron o kaha kanang imo sab nga uyab, apan di sab puwedeng ibalewala nimo ang imong ginikanan sa imong desisyon.
Kinahanglan mahibawo sila, mosugot man o dili. Kon ugaling di sila mosugot sa imong plano, aw, naa na nimo kon unsay imong hukom, magminyo ka ba bisan og wala ang ilang pagtugot?
Anyway, sa imo nang giingon naa na mo sa hustong edad nianang imong girlfriend karon busa wala na kinahanglana ang pagtugot gikan sa ginikanan.
Ang importante lang nga kamong duha andam na gyud nga magminyo.
Pangandami ninyo og maayo. Apan di na kinahanglan ang bongga nga reception, ang importante nga mapanalanginan sa Ginoo ang paghiusa sa inyong mga kasingkasing.
Noy Tikyo