NANGHARUS na sab ang SSS Tagum Branch, sa Davao del Norte og laing pasidungog sa tinuig nga kompetisyon nga gipaluyuhan sa Social Security System (SSS), tali sa mga branches niini sa nasud.
Nakuha sa SSS Tagum Branch ang nagkadaiyang awards sa 2018 Workplace Achievers Award - Medium Branch Category, ug Search for Ambassador and Ambassadress, sa nakalabay nga Septyembre 3-6, 2018 sa SSS Main Office sa Diliman, Quezon City.
Ang Annual Workplace Achievers Awards may upat ka kategoriya; kini ang Small Branch Category, diin nominado ang Pasig Rosario Branch, Mati Brancg ug Agoo Branch.
Anaa sab ang Medium Branch Category, diin nominado ang Tagum, Pasig Rotunda ug Malolos SSS Branches.
Sa Large/Mega Branch Category, nominado ang Bacolod, New Panaderos ug Dagupan Branch.
Ug sa Main Office Category, nominado ang NCR West Legal Department ug Data and Information Services Department.
Tungod sa maayong performance, ang SSS Tagum mibitbit sa kadaugan ug premyo nga certificate of recognition ug gift certificate nga P45,000 isip kampeyon, sa awarding ceremony nga gihimo, Septyembre 7.
Maikagong midawat sa pasidungog alang SSS Tagum Branch ang branch head, Ms. Roselane Plaza, ug sa 5s Quality Workplace Champion, mao si Hildebrando Ortega, OIC sa Tellering Section.
Sa pikas bahin, kung talent ang hisgutan, di sab pauwahi ang mga empleyado sa ahensiya.
Usa ka talent portion ang gihimo last September 5, 2018 gikan ala una ngadto alas singko sa hapon sa Ramon Magsaysay Hall, SSS Main Office.
Ang winners, gianunsiyo sab atol sa main event, Septyembre 7, sa samang venue.
Ang kandidata from Mindanao Group nga si Ms. Shiella Salarda sa SSS Tagum Branch, mipildi sa ubang 12 ka dilag nga nagrepresenta sa NCR, Luzon ug Visayas Group sa Search for Ambassador and Ambassadress.
Nakuha sa dalaga ang best in casual ug evening gown attires sa special awards.
Samtang si Ludwing Nico Alcober sa SSS Tagum Branch, mao say 2nd Runner Up sa final round.
Ang paghatag og pag-ila kabahin lamang sa dagkong kalihukan subay sa ika-61 nga anibersaryo sa ahensiya.
Ning bag-o lang sab, nag-courtesy call ang grupo ni Ortega ug duha ka pambato nila sa SSS Search for Ambassador and Ambassadress sa buhatan ni Tagum City Mayor Allan Rellon.
Ang SSS Tagum Branch anaa sa paggiya ni Acting Asst. Vice-President of Southern Mindanao 1, Mr. Rizalito Alberto de Leon.