Delos Reyes: Kinabuhi o kuwarta?

WALAY gikahatag nga kaayohan sa katawhan ang industriya sa mina kay dili makatumbas ang buwis nga gihatag sa mga kompaniya sa mina kon itandi sa kadaut sa kinaiyahan ug kinabuhi sa katawhan hinungdan nga buot ni Presidente Rodrigo Duterte nga hunongon na ang tanang klase sa

pagmina sa tibuok nasud.

Dili pa matino ang insakto nga ihap sa katawhan nga natabunan sa nagdahili nga bukid didto sa Itugon, Benguet atol sa pagkuso-kuso sa bagyong Ompong niadtong milabay nga semana.

Nagpadayon ang pagkubkob sa midahili nga yuta nga mitabon sa katawhan nga wa manumbaling sa awhag nga biyaan na ang maong dapit ug mohikling sa evacuation center alang sa ilang kaluwasan apan midangop sa ilang kapilya diin ilang gitapok ang ilang mga pagkaon panahon sa bagyo uban ang pagdahom nga luwas sila kay kapilya ang ilang gipasilongan inubanan sa ilang pagtoo sa Ginoo.

Dili na luwas ang katawhan sa maong dapit, sumala sa pagtan-aw ni Department of Environment Secretary Roy Cimatu hinungdan nga ipahunong na ang pagkubkob sa yuta ug ang tanang matang sa pagmina apan mialma ang mayor sa ilang lungsod kay wala nay panginabuhian ang iyang mga ginsakpan.

Sa pagpangduki-duki nga gihimo nahibaw-an nga tigpamalit diay og bulawan ang negusyo sa asawa ni mayor. Aw, mao diay!

Sa laing bahin, daghang atleta sa dakbayan sa Davao ang nagpangusmo kay gikansela ni Mayor Sara Duterte ang ilang biyahe aron makigtigi sa Batang Pinoy National Championship didto sa Baguio City tungod sab sa bagyong Ompong.

Ang safety sa mga atleta ang gihunahuna ni Mayor Inday dili ang dungog nga dad-on sa mga atleta sa ilang pagpauli. Gani man ang Davao City lang ang nagadala og mga sakop sa medical team aron mobantay ug maseguro ang ilang maayong kahimtang.

Wa igsapayan sa mayor ang minilyon nga gibayad sa mga ticket sa eroplano nga dili na mabalik sa panudlanan sa gobyerno kay sa masugamak sila sa mas labaw pang peligro.

Apan duna gyuy pipila nga wa manumbaling sa gihimo sa mayor tungod sa ilang personal nga mga ambition nga makabaton og dungog, gipadaplin ang desisyon sa mayor.

Kon kamo ang papilion unsa man ang inyong palabihon, kinabuhi, dungog o kuwarta?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph