GIISIP ni Senador Antonio Trillanes IV nga pagsamok o “harassment” ang kasong libelo nga gipasaka batok kaniya ni kanhi Davao City vice mayor Paolo Duterte, anak ni Presidente Rodrigo Duterte.
Gibutyag ni Trillanes nga nadawat nila ang kopya sa subpoena, pinetsahan Septyembre 10, niadto lang Lunes, Septyembre 17. Gihatagan ang kampo sa senador og napulo ka adlaw aron nga makasumite og counter-affidavit sa maong reklamo.
Niadtong Septyembre 6, si Duterte ug iyang bayaw nga si Manases Carpio misang-at og managlahi nga reklamong libelo batok Trillanes sa Office of the City Prosecutor sa siyudad sa Davao.
Giingong si Trillanes nag-akusa kanila, atol sa interbyu sa radyo, nga nakig-abin siya uban sa Land Transportation Franchising and Regulatory Board Regional Director Ahmed Cuison aron nga mangayo og salapi una aprobahan ang prangkisa sa Uber, niadtong nag-operate pa sa Pilipinas.
Apan gilimod kini sa senador ug misaad nga mopatim-aw siya sa Davao City prosecutor kon gikinahanglan.
Usa lang kini sa kaso nga nasugamakan ni Trillanes ning panahona. Una niini, gipasakaan sab siya og kasong “inciting to sedition” ni Labor Undersecretary Jacinto Paras, kinsa misang-at sab og kasong grave threats batok sa senador.
Ang kasong sedition nag-ugat sa giingong pagdani sa senador ngadto sa mga sundalo nga morebelde batok Presidente Rodrigo Duterte.
Gawas niini, desisyonan pa sa Makati Regional Trial Courts kon pagawsan ba siya og warrant of arrest ug hold departure human gipawalay bili ni PRRD ang iyang amnestiya sa dihang milusad og duha ka managlahi nga kudeta niadtong 2003 ug 2007.
Di kaha kini bawos na ngadto kang Trillanes sa pagpaturagas niya og mga akusasyon ngadto sa mga nahisgutan nga way igong basehan?
Kay matud pa lagi, “ang mga kabuang nga imong gibuhat ngadto sa uban, mobalik ra unya kini kanimo.” Mao ni ang gitawag og karma.