TACURONG CITY -- Wa makapiog ang mga miyembro sa New People's Army (NPA) sa puwersa sa Citizen Armed Forces Geographical Unit (Cafgu) human miatake sa outpost alas 10:15 sa gabii niadtong Martes, Septyembre 18.
Base sa taho gikan sa Sultan Kudarat Police Provincial Office, nasayran nga gisulong sa NPA ang outpost sa Cafgu sa utlanan sa Columbio, Sultan Kudarat ug Datu Paglas, Maguindanao Province.
Apan dali rang nakabawos ang mga Cafgu hinundan sa 25 minutos nga binakbakay una miatras ang mga NPA nga giingong ubos sa Guerilla Front Committee 73.
Walay naangol o napatay sa bahin sa mga Cafgu apan dili matino sa mga NPA nga giingong gipangulohan ni Kumander Sixto.
Mga sundalo ug pulis hugot nga nagbantay karon sa ilang areas of responsibility sa posibleng paglusad og halapad nga pagpangatake sa mga NPA aron ipanimalos ang kamatayon ni Jacob Rodinas, alyas Kumander Jecko nga napatay atol sa engkuwentro tali sa 39th Infantry Battalion, Philippine Army didto sa Sitio Flortam, Brgy. Batasan, Makilala, North Cotabato. (Edgar E. Fuerzas)