KAY gustong himuong legal ang panagtipon, way duha-duha nga nagpakasal ang 80-anyos nga bana, uban sa iyang 60-anyos nga asawa sa libreng Kasalan ng Bayan sa Talicud Island, Island Garden City of Samal, niadtong Huwebes, Septyembre 13.
Si Eulogio nga biyudo nakig-ipon na kang Nida Dayangco sulod na sa 16 ka tuig ug usa sa 55 ka paresan sa libreng kasalan sa isla.
Espesyal kaayo alang kang Eulogio sanglit ang ilang kasal naatol sa iyang ika-80 nga adlaw'ng natawhan.
“Wa ko magdahom nga natunong sa birthday, September 13, 1938,” matud ni Eulogio nga nakadawat og regalong “cash” gikan kang Gobernador Anthony del Rosario, Senior Board Member Rodney del Rosario, BM Raymund Millan ug provincial administrator Samson Sanchez gawas pa sa daghang regalo.
Pinaagi sa Best People development agenda sa gobernador, gusto niini nga dalhon ang mga serbisyo nga libre ngadto sa tanang Dabaonon nga nagpuyo sa Davao del Norte ilabi na niadtong naa sa lagyong dapit lakip na ang paghimong legal sa nag-ipon-ipon nga mga magtiayon.
Gawas sa gipaduol nga pangunang serbisyo sa DavNor Kapitolyo, gipahibalo sab sa gobernador nga ang mga “Malasakit Center” nagserbisyo na sa tuyo nga walay bayaran ang mga pasyente sa ospital sa gobyerno.
Ang Davao Region diin naapil ang Davao del Norte maoy pinakaunang rehiyon sa Pilipinas nga adunay mga centers alang sa “zero billing.”
Sa matag hatud sa Serbisyo Caravan gihatagan gayud og linain nga pag-atiman ang mga senior citizens pinaagi ug paggahin og adlaw alang kanila.
Gawas sa mga serbisyo, ang Local Government Units sa mga barangay sa Sta. Cruz, Dadatan, Cogon ug Linusotan sa Talicud Island pulos nakadawat og tagsa ka mga generator set dala sa BEST PEOPLE caravan of services ni Gobernador AGR. (PR)