GIBALHOG sa prisuhan ang usa ka amahan human giingong miunay og kulata sa iyang duha ka mga anak nga nag-edad og uno ug singko anyos sa siyudad sa Gingoog, Misamis Oriental.
Ang hulagway amahan nga si Roy (dili tinuod nga pangalan) gi-post sa usa ka concerned citizen sa Facebook.
Saysay sa post sa concern citizen nga iyang nasakay sa dyip ang mga bata nga labihan ka bun-og sa ilang nawong kauban ang inahan.
Dihang gipangutana kun asa nagpuyo nagsumpaki ang tubag niini lakip na sa inahan, apan namatikdan nga sa Barangay Odiongan sa Gingoog mihunong ang mga biktima.
Ang Gingoog City Police Station sa pagpangulo ni Police Superintendent Ariel Phillip Pontillas nakigkoordinar dayon sa Barangay Council sa Barangay Odiongan kauban ang Barangay Peacekeeping Action Team (BPATs) ug milampos sa pagsikop sa amahan.
Gikatakda kining kasohan og kasupakan sa Republic Act 7610 (Special Protection of Children against Child Abuse, Discrimination and Exploitation).
Ang mga nakakita sa post mihulagway sa mga biktima nga posibleng kanunay na nga gibun-og.
“Nakita nako na ang bata nagkugos sa iyang manghod ibilin unta sa iyang mama kay maglakaw lang daw siya kadali. Ang bata nga gikulata singko pa iyang idad.” post sa ilang silingan.
Giingong niagi na usab kini og layas ang bata tungod kay kanunay bunalan sa iyang amahan ug inahan ug giingong gipasoan pa ang kamot ug tiil, gani samaran pa ang dughan niini.