LABIHAN ang pag-ubos sa mga nag-unang kriminalidad sa probinsya sa Misamis Oriental.
Kini ang report ni Misamis Oriental Provincial Director Rolando Destura atol sa Provincial Peace and Order Council (PPOC) meeting nga gitambongan sa nagkalain-laing ahensya sa probinsya.
Matud ni Destura nga kon itandi niadtong tuig 2017 dako ang pagkunhod sa porsyento sa gitawag niining walo ka mga “focus crimes” sama sa murder, homicide, physical injury, rape, robbery, theft, ug carnapping.
Sa kasong murder niaging tuig, gikan sa bulan sa Hunyo paingon sa bulan sa Agusto mokabat sa 49 ang natala apan ning tuig susamang kwarter moabot lamang sa 35 nagpasabot miubos kini sa 14 ka insidente ug nagbaton og 28.57 porsiyento sa pagkunhod.
Gikan sab sa 15 ka kaso sa homicide ning tuig aduna na lamang siyam ka mga kaso gipasaka sa korte nagpamatuod nga miubos sa unom ka insidente o 40 porsiyento ang mga kaso sa homicide.
Ang physical injury aduna kaniadto 321 ka mga kaso apan 132 ka mga kaso lamang sa maong krimen ning tuig ang natala diin kini ang usa sa pinakataas ang pag-ubos ngadto sa 189 ka insidente kon 58.87 porsiyento ang pag-ubos.
Samtang sa kasong rape, gikan sa 107 aduna na lamang 49 ka mga kaso sa maong krimen karong tuig diin nagpamatuod nga miubos sa 58 ka insidente kon 54.20 porsiyento.
Gikan sa 149 ka kaso sa pagpanulis aduna na lamang 149 ang natala ning tuig diin miubos sa 108 ka insidente kon 72.48 porsiyento ang pagkunhod niini.
Sa kasong pagpangawat, gikan sa 407 niaging tuig aduna na lamang 73 ka mga kaso sa maong krimen karong tuig diin nagpamatuod nga miubos sa 334 ka insidente kon 82.06 porsiyento ang mga kaso sa pagpangawat.
Ang kaso sa pagpangarnap gikan sa 52 aduna na lamang 25 ka mga kaso karong tuig diin miubos kini og 27 ka insidente kon 51.92 porsiyento.
Sa kataas sa pagkunhod niini nagpamatoud lamang kini nga miubos ang average monthly crime rate og 25.94 o 46.76 porsiyento samtang average monthly index crime rate nga 9.9 o 66.04 porsiyento.
Matud ni Destura nga dako iyang pasalamat sa kooperasyon sa katawhan sa probinsya labaw sa tanan dako og tabang ang padayon nga operasyon sa kapolisan batok niining mga pagpangdakop sa mga wanted person ug labina ang giyera kontra druga diin usa sa nakita nga maoy hinungdan nga gakatigayon ang mga dagkong krimen.