GIPANIGURADO sa Bureau of Customs (BOC) nga walay matanggong nga mga shipment ilabi na sa bugas sa Mindanao Container Terminal (MCT) human gipalambo na ang sistema.
Gibutyag ni Atty. Floro Calixihan sa BOC atol sa gipahigayong committee meeting ni Kagawad George Goking sa Trade and Commerce nga wala na’y bugas nga natanggong o na delay sa pagpagawas karong mga panahona gumikan kay duha na ka X-ray machine ang ilang gigamit.
Nasayran nga nadugayan sa pagpagawas ang container sa mga bugas gumikan lamang sa hinay nga proseso hinungdan nga gi-inspeksiyon usab kini sa tinugyanan sa National Bureau of Investigation (NBI) human nakadawat og taho.
“Marami pong pina-process at saka that time isa lang po ang X-ray but now we are using two X-rays kaya po normal na po ngayon,” pahayag ni Calixihan.
Gibutyag niini nga medyo aduna’y pagkalangan tungod kay alerted matud pa ang maong shipment diin kinahanglan nga ipa-ilalom sa pag X-ray ug 100 porsiyento nga eksaminasiyon.
Nasayran nga niadtong Septiyembre 12 nga inspeksiyon sa tinugyanan sa NBI, gikumpirma usab kini sa BOC nga aduna’y 79 nga container sa bugas nga na delay ang pagpagawas niini gikan sa maong terminal sa Tagoloan.
“Around 79 containers filled with rice coming from different port of origin, kasi may merong from Vietnam, Thailand, may mga importers yun,” pahayag ni Pastor Oran III, Special Investigation III sa NBI.
Giingong human usab sa maong inspeksiyon nagbuhat na dayon ang maong buhatan og dinaliang release order.
Giingong napagawas na ang maong mga bugas ug karong mga panahona wala na’y natanggong nga bugas sa MCT.