GIKUMPIRMA ni Cagayan de Oro City Mayor Oscar Moreno nga subli kining magpapili sa pagka mayor karong umaabot nga eleksiyon sunod tuig 2019.
Gibutyag ni Moreno nga kumpleto na ang ilang line-up apan gitutokan una niini ang pagpanerbisyo sa katawhan sa siyudad.
“Trabaho lang ko, kumpleto naman na, ako focus lang ko sa trabaho and that’s the best politics,” dugang ni Moreno.
Dugang niini nga daghan pa kini og angaya’ng buhaton ilabi na aron nga mapadayon ang mga serbisyo nga angayang matagamtaman sa katawhan sa siyudad.
“Of course, yes daghan pa atong gusto buhaton, daghan pa atong serbisyo nga angay ipaabot sa dakbayan, to sustain the momentum, the momentum of growth and prosperity,” pahayag ni Moreno.
Gidugang pa niini nga buot lamang niya nga mapadayon ang kalamboan sa gipanghingusgan nga programa ilabi na diha sa edukasiyon, panglawas, pagpadayon sa mga kadalanan sa kabukirang bahin ug uban pa.
Mapasigarbuhon usab niining gibutyag nga makita ang iyang pagpaningkamot pinaagi sa mga award nga nadawat diin kini makapaaghat sa mga negosyante nga mobubo og pundo dinhi sa dakbayan.