GIHUPAY sa konseho, dakbayan sa Cagayan de Oro ang kabalaka sa katawhan kabahin sa presyo ug suplay sa bugas.
Usa ka tigum ang gipahigayon sa komitiba ni Kagawad George Goking, sa ways and means kauban ang Department of Trade and Industry, National Bureau of Investigation, National Food Authority (NFA), Philippine National Police, Bureau of Customs ug uban pa nga hingtungdang ahensiya aron nga mahatagan og katin-awan ang tanan ilabi na ang isyu sa bugas.
Gibutyag ni Goking nga dili angaya’ng mabalaka ang katawhan gumikan kay aduna na’y gihimong lakang ang lokal nga panggamhanan ug gikumpirma usab sa NFA nga adunay igong suplay sa bugas.
“After our meeting with the NFA ilang official statement nga we have enough rice and the price are being controlled to the level of affordability,” pahayag ni Goking.
Gidugang pa niini nga ang lokal nga kagamhanan nitabang pagmonitor sa suplay ug sa presyo sa bugas dinhi sa siyudad.
“So ayaw mo kabalaka kay naa man dire ang local government sa Cagayan nga we are helping in the monitoring of supply of rice ug ang presyo,” dugang niini.