Fredrick F. Gelbolingo
121 Prenza, Argao, Cebu
DIYUSNONG magtutudlo, ania kami karon binuksan ang kasingkasing sa imong mga pulong. Dinhi niining tigom imo kaming gitawag aron lamang mabuhi sa imong mga hatag. Aron lamang mabuhi sa imong mga hatag,” mikanta ang tawo nga mao ra say miduyog sa iyang sista.
“Wa nay laing nahibaw-an nga kanta ning tawhana,” ni M’am Utos nga nagtibo-tibo ang baba sa pagkadungog niya sa ‘entrance song’ sa misa nga diha ipahigayon sa kwadranggol ning ilang eskuylaan matag ‘first Friday of the month’ sa alas nuybe sa buntag. Diha siya maglingkod sa lingkuranan luyo sa tigduyog og sista nga mao ra poy tigkanta.
“Bag-o na lang ang pari ning parokyaha, pero ang iyang duyog-duyogan sa misa mao ra gihapon ang iyang kanta sa entrada sa misa,” padayong bagutbot ni M’am Utos.
Wa gyud magkadipulos ang pagsimba ni M’am Utos karong adlawa. Naghinubra gyud ang iyang kapungot ning tawhana nga tigduyog ug tigkanta sa misa, kay balik-balik ra ang kanta sa entrada sa misa. Nagtapok ra sa gawas sa iyang dunggan ang mga ‘reading’. salmo, wali sa pari ug pag-ampo sa katawhan, kay kaligutgot man ang naghari sa iyang kasingkasing ug hunahuna, kon unsaon niya pagkasaba kining tawhana inigka human sa misa.
Tungod kay gipalabi niya ang di maayong pagbati, sa ‘offertory’ pa lang minganga na si M’am Utos atubangan sa pari, kay abi niya’g pangalawat na. Gingangahan pod siya sa pari tungod sa kahibulong. Gibukhan siya sa palad sa pari aron pagpahinumdom nga panahon pa sa tinghalad.
Pagka human sa misa wa gyud palabya ni M’am Utos ang diha sa iyang hunahuna kaganina. Iya gyud kining gipalugwa sa tigkanta.
“Brod, daghan lagi kag kanta nga nahibaw-an para sa halad, pangalawat ug inigka human sa misa, pero imong ‘entrance song’ nganong ‘Diyusnong Magtutudlo ra man gyud?” matod ni M’am Utos. Nagpugong siya sa pangusmo sa kasuko, pero mikurog gyud ang iyang baba. Mikunot ang daan na niyang kunot nga nawong.
“Kinahanglan man god kaayo sa mga estudyante ang mga ‘Diyusnong magtutudlo’, M’am, nga maoy mogiya kanila sa maayong mga pagtulon-an nga kinahanglang buhaton sa hunahuna, sa pulong ug sa buhat, aron dili sila mahitumpawak sa dalan sa kadautan ug kaalautan samtang buhi pa dinhi sa kalibutan,” matod sa tigkanta ug tigduyog sa misa.
Gusto untang masuko si M’am Utos, apan nasiklapan niya ang pari. Misinyas kini og ‘thumbs up’ sa tigduyog, nga gisundan og hungit sa iyang baba.
“Okey na?” sa pari nga mingisi ngadto kang M’am Utos. “Mang-esnak na mi!”
Wa motingog si M’am Utos nga miduko. (KATAPUSAN)