SIRHAN karong adlawa ang viaduct sa Marcelo Fernan Bridge nga modulhog sa Barangay Pusok, dakbayan sa Lapu-Lapu alang sa upat ka adlaw nga pag-repair niini.
Apan publiko nakurat sa maong kalambuan ilabi na nga minus ang pahibalo o ang pagpakatap og information kalabot sa maong proyekto sa Department of Public Works and Highways (DPWH).
Igo rang dunay gibutang nga tarpaulin sa tiilan sa bridge nga nagpahibawo kabahin sa viaduct rehabilitation.
Ang officer-in-charge sa City Traffic Management System (CTMS) Mario Napule nipahibawo nga adunay silay mga enforcer nga ipakatap aron mogiya sa mga motorista nga mogamit sa maong tulay.
“Ang DPWH mismo magbutang gyud sila og mga traffic signages kay ila man gyud nang mandato. Ang CTMS pag-manage lang gyud sa traffic diha (2nd bridge),” matod ni Napule.
Gipahibawo ni Napule ang mga motorista nga manukad sa Mandaue City paingon sa Lapu-Lapu mamahimo gihapon nga mogamit sa ikaduhang taytayan apan mosubay na sa one-lane viaduct nga molahos sa mercado - Poblacion, Lapu-Lapu.
Samtang sa mga sakyanan kansang rota paingon sa airport, MEPZ1 o sa norte nga bahin sa Lapu-Lapu nga mogamit sa viaduct lahos sa Poblacion makahimo sa pag-U turn sa eskena sa Pusok-Cemento (atbang sa 7/11 convenience store) paingon sa ilang tagsa-tagsa ka mga destinasyon.
Gipanglantawan sa opisyal nga mohinay ang dagan sa trapiko sa 2nd bridge samtang mga light vehicles mamahimong mo-divert ngadto sa 1st Mactan-Mandaue Bridge paingon sa Pusok o airport area.
Giangkon ni Mandaue City Mayor Luigi quisumbing nga short notice lang ang pagpahibaw sa DPWH.
Hinuon nakasabot ra usab sila nga gikinahanglan nga matrabaho na kini sa daling panahon.
Gitug-an ni Glenn Antigua, pangu sa Traffic Enforcement Agency of Mandaue (TEAM) nga niadtong Martes lang atol Mactan-Cebu Bridge Management Board (MCBMB) sila gipahibaw sa DPWH 7. Matod ni Antigua nga kon napahibaw lang sila bisan usa ka semana sa di pa ang pagpaayo, posibleng mopahimutang sila og truck ban sa maong lugar. (FVQ ug Fe Marie Dumaboc)