NIADTONG Sabado, gidala namo ang among duha ka bugoy sa dentist. Wala man nagsakit ilang ngipon. Nabantayan lang namo naa na silay tooth decay ug nagsugod nag kabangag ilang bag-ang.
Ang una namong gibuhat sa akong asawa mao ang pagpangitag dental clinic nga child-friendly. Di ko gusto nga unsay nahitabo nako sa bata pa ko mahitabo sab sa akong mga bata karon. Kinahanglan dili traumatic ang una nilang pagbisita sa dentist.
Kon wa ko masayop, nahisgotan na ni nako sa una nakong mga kolum, apan balikon nako karon kay importante kaayo kini nga bahin sa akong pagkabata.
Grade one ko atong panahona, sama aning akong kinamaguwangan karon. Annual dental check-up to sa eskuylahan. Pirmiro to namong pagbisita sa dentist.Ining edara man gud, di ka kinahanglag dentist kay kanang baby teeth mangatagak ra nag ilaha. Mao ra ni silay baby nga di matiguwang mamatay dayon. Apan matod pa ni teacher, as early as possible kinahanglan magsugod na ang bata og bisita sa dentist aron limpyo kanunay ang ngipon.
Ug mao to, naglinya na mi gawas sa clinic. Ako ang miboluntaryo nga mag-una kay lider-lider man ko sa klase. Kinahanglang ipakita nako sa akong mga classmate nga isog ko, kay ang uban namo nangluspad na man.
Ug gitawag na akong ngalan, ug misolud na ko sa clinic. Ug labihan nakong pangluspad, luspad pa’s kinalusparan nga classmate nako sa gawas, dihang nakita nako ang mga gamit sa sulod. Morag mga gamit sa panday nga nagtrabaho sa among kasilyas – naay morag dagway og tigib, atsa, bara, gabas, martilyo, bangkaw ug uban pa.
“Kinahanglang ibton ni imong usa ka ngipon kay dako na kaayog bangag,” ingon ang dentist. “Aaank aaank aaank,” nagnganga ko nga mitubag. Giandam dayon niya ang injection para anestisya. Ug kay ang tan-aw nako sa injection screw driver man gyod, ninglukso ko’s lingkoranan dayong sutoy og dagan padung gawas.
Sukad ato, mangluspad na ko bisag makadungog man lang sa pulong nga dentist. Kausa, college na ko, naa koy gikaibgan. Padung na unta kong manguyab, pero ning-atras ko dihang nahibaw-an nako nga dentistry iyang kurso. Ingon ana ka traumatic akong unang experience sa dentist.
Ug mao to niadtong Sabado, naa mi nakit-an nga clinic nga child-friendly kaayo. Kon makig-istorya ang dentist sa bata morag kindergarten teacher paminawon. Smiling, pasensyosa, buotan, motherly. Ang dental chair dili sama sa amo kaniadto nga morag electric chair. Sa TV screen sa atubangan ipasalida ang paboritong movie sa bata. High tech. Limpyo. Laysho.
Wa nahadlok ang mga bata. Gani, excited pa sila nga mobalik sunod semana aron pastahan na ilang bangag sa ngipon.
“Pila tanan miss?” nangutana ko sa cashier. Pagkahibawo nako sa bayranan, morag nangatagak akong ngipon sa kamahal. Nangluspad ko, nangurog, nahadlok, gipaningot, lami kaayong isutoy og dagan padung gawas, sama niadtong una nakong pagbisita sa dentist.