LAYO na tong Laoag City sa Ilocos Norte apan nahinumduman gihapon ni Presidente Rodrigo Duterte ang pangalan sa ‘kanhi laos nga pulitiko’ diin gitawag kini niya og ‘gago’. Atol sa press briefing sa assessment nga namugna sa Bagyong Ompong didto sa Laoag uban ni Ilocos Norte Imee Marcos, kalit lang nahisgutan ni Duterte ang ‘kanhi laos nga pulitiko’ sa dihang naghisgot sila og mga Bisaya uban ni Toursim Sec. Bernadette Romulo-Puyat.
Matod pa sa President; ‘Otro pod tong Bisaya sa Cebu. Kuhaan ang pulis og armas. Kuhaan ang pulis og patrol car. Buhian ang mga dinakpan sa pulis nga nahilambigit sa illegal nga butane canister refilling business. Yabag o gago tog utok.’
Morag sakit-sakit gyud sab hinoon ning maong mga pulong. Una nang gibalikas ang ‘kanhi laos nga pulitiko’ ni Duterte atol sa pagbisita niini sa 49th Charter Day anniversary sa Mandaue City niadtong Agusto 29 diin iya kining gihulga nga tamparoson.
Aw, maka-ingon ta nga mirisi kay arogante man kaayo. Mora man og siya nay hawud. Maayo lang kon mga ordinaryong tawo ang kontrahon kay iya gyud nga paludhon. Apan Presidente naman ang iyang gibangga mao nga mikakak. Wala man gani mosustiner sa iyang away sa kapulisan. Insakto tong gi-ingon ni Digong nga nayabag na gyud na siya. Usab-usab ang utok morag mosuol og buwanon.
Hangtod karon wala pa gyud siya mi-atubang sa media aron ipanghimakak kining isyo kabahin sa iyang gihimo sa tulo ka mga dinakpan sa kapulisan nga nag-refill og butane canister gamit ang liquefied petroleum gas. Mahilambigit niini mao ang kaalyado nga si Peter Osmeña Vicitasion nga kasusyo ang iyang anak nga si Miguel. Dili siya makatubag kay tinuod man. Kadtong iyang pagpagawas sa tulo ka mga dinakpan dili sa ingon nga mitabang siya kay mga pobre kadto.
Iyang gipagawas kay trabahante sa kasosyo sa illegal nga negosyo sa iyang anak. Ikaw maoy mayor ug moprotiher og illegal nga negosyo? Di illegalista pod ka. Wala kaha usab siya maapil sa ubang mga illegal nga negusyo? Nangutana lang ko. (bobbygnalzaro@gmail.com)