DILI ta makabasol kon mipadayag si Cebu Governor Hilario Davide III sa iyang pagduda kon mahatagan ba og hustisya kining sunodsunod nga pagpamatay og mga inilang personalidad sa Sugbo.
Kini tungod kay dili man sab nato ikanigar nga sa niaging pipila na ka mga buwan, nagkutay-kutay ang patay diri, patay didto sa bisan asa nga dapit sa Sugbo nga naglakip sa mga piniling officials apan hangtod karon wa gihapon mahatagi bisan og anino na lang sa kasulbaran.
Sa uwahing kuwentada sa mga high-profile nga patay mao ang pagtipi ni Ronda Mayor Mariano Blanco III niadtong Septiyembre 5.
Si Blanco nga usa sa nahinganlan ni President Rodrigo Duterte nga nalambigit sa pagpayuhot sa gidiling drugas, gisulod sa munisipyo pasado ala una sa kadlawon ug gibanhigan-patay sa wala mailhing armadong mga tawo.
Way nailhan ang mga pulis nga mga suspetsado.
Niadtong Pebrero 18, ang vice-mayor sa maong lungsod nga si Atty. Jonah John Ungab giatngan usab gikan sa hearing sa iyang kliyenteng suspetsadong bigtime drug lord Kerwin Espinosa nga gipusil-patay sulod sa iyang sakyanan.
Ang kamatayon nila ni Barangay City Councilor Art Stephen Bas sa Talisay City, ang paglikidar sa duha ka PDEA agents nga si Earl Rallos ug Von Rian Tecson, ang pag-ambush sa negusyanting hapon nga 71-anyos nga si Junko Hamada, ang pagpusil-patay sa Korean national nga si Young Ho Lee sulod sa hotel sa Mabolo maoy pipila lang sa mga kaso nga wa tay makita nga dunay pultahan sa hustisya.
Kini maoy igo na kaayong basehan sa giluwatang pamahayag sa gobernador kansang pagsalig sa kapulisan natibhangan.
Taliwala ning mga panghitabo, “Cebu is still safe” kon si PRO 7 director Debold Sinas ug Cebu City chief Royina Garma ang pasulti-on. Motuo mo?