GIKLARO sa National Food Authority (NFA) 7 nga way rice shortage sa Sugbo ug tibuok Central Visayas.
Kini atol sa tigum sa Local Price Coordinating Council (LPCC) sa Kapitolyo.
Sa buwan Oktubre, gitumbok sa NFA nga mosaka na ngadto sa 750,000 ka sako sa bugas-humay ang ilang suplay alang sa Rehiyon 7.
Atol sa LPCC meeting, gipahibawo ni NFA 7 Assistant Regional Director Diocano Alojado, Jr., nga way price movement sa NFA rice karong semanaha.
Gilantawan usab sa NFA 7 nga monaog hinuon ang presyo sa NFA rice sa mosunod pa nga mga semana.
Kini tungod usab daghang suplay nga kasamtangang anaa karon sa ilang mga warehouse ug umaabot usab mga suplay.
Matod ni Alojado nga sa kasamtangang dunay 413,000 ka sako sa NFA rice sa ilang mga warehouse lukop rehiyon.
Sa buwan sa Oktubre, gipaabot nga mosaka kini ngadto sa 750,000 ka mga sako sa NFA rice ug gipaabot nga molungtad ug hangtud 100 ka adlaw.
Si DTI 7 Regional Director Asteria Caberte niawhag sa mga LGU nga motabang sa NFA sa distribusyon sa bugas diha sa ilang mga lokalidad.
Gawas sa NFA, lakip sa mga ahensiya nga nipresentar sa dagan sa ilang monitoring sa presyo sa mga nag-unang palaliton mao ang Department of Agriculture, Trade and Industry, Health ug Energy.
Sigun sa DA, ang presyo sa mga utanon ug lagutmon nagmahal karon sa Carbon Public Market tungod kay sagad niini gikan pa sa Cagayan de Oro sa Mindanao.
Giangkon ni LPCC Chairman Gob. Hilario Davide III nga di igo ang suplay gikan sa Mantalongon, Dalaguete ug uban pang lokalidad sa Sugbo alang demand sa utanon dinhi sa probinsiya.
Ang DOE-Visayas sa ilang bahin nitaho sa LPCC nga karong tuiga, duna nay 35 ka price movement sa krudo ug gasolina, diin 25 niini ang pagsaka ug 10 lang ang rollback.
Sa kinatibuk-an, moabot na sa P10.72 ang net adjustment sa presyo sa gasolina ug P10.80 sa diesel.
Matod ni Davide, himuon na unyang regular ang mga LPCC meetings ug ang mga implementing agency maoy iyang tahasan paggukod niadtong mga mopaburot sa presyo sa mga palaliton nga sobra sa suggested retail price. (AZLG)