GILAUMANG makaduwa na’g balik ang Sugbuanong higante nga si JuneMar Fajardo sa sunod buwan alang sa San Miguel Beermen kon magpadayon ang pagkaalim sa iyang angol.
Nagkanayon si San Miguel team manager Gee Abanilla nga nagpakondisyon na’g sugod ang produkto sa University of Cebu (UC) Webmasters sukad gitangtang ang protective boot sa naangol niyang tuo nga tiil.
Apan giklaro ni Abanilla nga dili pa puwedeng makaapil ang lumad nga taga lungsod sa Pinamungajan, Cebu sa ilang mga praktis alang sa ilang kampanya sa Philippine Basketball Association (PBA) Governor’s Cup.
“He’s on schedule but has not participated yet in practice. He is doing his own conditioning monitored by our head PT,” matod ni Abanilla nga napatik sa PBA official website.
Nasinati ni Fajardo ang iyang angol niadto lang Agusto hinungdan nga wala una siya gipaduwa sa Beermen sa Governor’s Cup.
Ang Beermen nabunyagan og 125-112 nga kadaugan batok sa NLEX Road Warriors apan nasugamak sila sa 100-103 nga kapildihan kontra sa Blackwater Elite.
Ang Fil-German nga si Christian Standhardinger maoy nipas-an sa obligasyon ni Fajardo ug naposte kini’g 28 puntos nga average sa nag-unang duha ka mga duwa sa Beermen.
Gumikan sa iyang angol, wala sab nakaduwa si Fajardo sa 2nd window sa FIBA World Cup qualifiers batok sa Iran ug Qatar.
Napilde ang Team Pilipinas sa Iran apan mingdaog kini batok sa Qatar.
“Sayang kasi hindi ako nakalaro pero hindi ko pwedeng ipilit kasi ‘yun ang advice ng doktor,” asoy sa 6’10” nga magduduwa. (ESL)