USA lang ka lane sa viaduct sa Marcelo Fernan Bridge habig sa Lapu-Lapu City ang gisira inay ang pagpatuman sa total closure base sa na-unang pahibawo sa Department of Public Works and Highways (DPWH) Cebu 6th District Engineering.
Bul-og sa trapiko nasinate sa 1st Mactan-Mandaue Bridge kagahapon sa buntag sa dihang mga motorista milikay sa pag-agi sa 2nd bridge gumikan sa gikatahong pagsira niini.
Ang officer-in-charge sa City Traffic Management System sa Lapu-Lapu, Mario Napule nagkanayon unang gitrabaho ang usa ka lane sa viaduct, samtang bukas ang pikas lane nga magamit sa tanang motorista nga molahos sa Barangay Pusok o airport road.
Nasayran ni Napule nga gikan sa 10:00 sa gabii ngadto na sa 4:00 sa kaadlawon sirhan ang duha ka lane sa viaduct nga molugsong sa Pusok aron nga subsob ang pagtrabaho sa DPWH, samtang sa adlawan ang usa ka lane buksan sa tanang motorista.
Kagahapon lang usab nasayran nga inay upat ka adlaw ang pagtrabaho sugod kagahapong adlawa, molanat na ngadto sa Septiyembre 30 ang viaduct rehabilitation.
Matod pa ni Napule nga gumikan sa na-ungot nga trapiko sa first bridge ilabi na niadtong naggikan sa Mandaue City nga molabang sa Lapu-Lapu gi-manual ang pag-operate sa traffic light.
“Ako nalang gipa-manual (traffic light) aron mahabwa ang mga sakyanan gikan sa Mandaue. Ang ikog (traffic) gud moabot sa pocherohan (eskena Ouano Avenue),” tipik sa pamahayag ni Napule.
Nasinate ang grabeng kahuot sa trapiko gikan sa 7:00 sa buntag og nalugak-lugakan ang bul-og sa sakyanan pasado na sa 10:00 sa buntag.
Sa sayo pa, nakugang ang publiko sa kalit nga pagpahibawo kalabot sa pag-repair sa viaduct sa maong tulay sa dihang way gihimong pasi-unang pahibawo ingon man advance notice kalabot sa proyekto sa DPWH. (FVQ)