UNANG nilinog dayon daw sa nidugdog ug mao na lang ang nabantayan ni Cristita Villarba nga niaso na ug may nikayo sa balay duol sa ilahang panimalay.
Ang sunod nabatian sa 53 anyos nga ginang nga nagsinigitay na ang iyang mga kabanay nga nangayog tabang.
“Tabang tabang” unya nanagan mi padung sa ubos,” saysay ni Villarba dihang nagdahunog ang dagkong mga bato ug yuta ug nitabon sa panimalay sa iyang igsuon nga si Lauro Campanilla sa Sitio Sindulan, Barangay Tinaan, siyudad sa Naga alas 5:20 Huwebes sa buntag.
Duha ka balay ang ilang distansya gikan sa panimalay sa mga Campanilla.
Si Lauro, iyang asawa nga si Marcelina, ilang mga anak nga si Lemuel, Lexter ug Leo ug ang ilang mga asawa ug mga anak ang wala pa igkita sa pagkutlo ning balita.
Hangtod sa alas 3 sa hapon, 64 pa ka mga individual ang padayon nga gipangita sa mga rescuers gikan sa lainlaing rescue groups sa kagamhanan sa siyudad sa Naga, kasikbit nga mga local government units, Bureau of Fire Protection ug ubang pribadong grupo.
Ang mga nangamatay sa hitabo mao sila si Olivia Moral, 63; Sheila Mae Campanilla, 24; Annabel Lobiano, 40; Romeo Jaballa, 50 ug usa ka bata nga wala pa mailhi.
Lima ka mga barangay sa Naga ang gipaubos na sa state of calamity tungod sa mga insidente sa pagdahili sa yuta nga naglakip sa Tinaan, Mainit, Pangdan, Cabungahan ug Naalad.
Mga alas 5:28 sa hapon, 14 na ka lawas ang naugkat.
Matod ni Tinaan Barangay Kapitan Teodoro Cantal Jr. nga duha ka semana ang nakalabay gipahibawo sila sa pipila ka mga molupyo sa Sitio Tagaytay, nga dunay dako nga crack nga nakit-an sa bungtod ibabaw sa Sitio Sindulan.
Iyang gipahibawo niini ang taga Apo Land ug niadtong miaging semana, gipabakwit ang mga pamilya nga naa nanimuyo ibabaw sa bungtod ug niadtong Miyerkules sa gabii gihakot usab ang pipila ka pamilya sa Tagaytay.
Sumala ni Cantal nga gipa-force evacuation ang mga residente sa Sitio Tagaytay tungod sa presensiya sa dakong liki sa bungtod.
“Ang uban wa mobakwit tungod kay way kwarta. Ang uban nagbantay sa ilang kahayupan,” dugang saysay niini.
Sigon sa kapitan ang Sitio Tagaytay nasakop sa quarry site sa Apo Land samtang ang Sitio Sindulan nahimutang sa ubos.
“Kada adlaw sige na og quarry diha. Ang Tagaytay ang unang affected sa lanslide unya pagdahili sa yuta padung sa ubos, naapektuhan og apil ang Sindulan unya natabunan tong mga balay sa ubos,” sugilon ni Cantal.
Gawas sa pagliki sa yuta sa bungtod nakatampo usab ang pag-uwan niadtong Miyerkules sa gabii ug Huwebes sa buntag.
Bakwit
Si Provincial Disaster Management office head Baltazar Tribunalo, uban kang Cebu Governor Hilario Davide IIII ug City of Naga Mayor Kristine Vanessa Chiong, daling niumol og task force sa pagdumala sa search, rescue ug retrieval operations sa dapit.
Si Chiong, sa lahi nga interview, niseguro nga ilang abagahon ang galastuhan sa pagpalubong niadtong mga nangamatay ug gastuhan sa ospital sa survivors.
Kapin sa 300 ka mga lumolupyo sa Sitio Tagaytay ug Sindulan ang gipabakwit sa Enan Chiong Activity Center (EVAC) sa Barangay South Poblacion, APO-CEMEX close court sa Barangay Tinaan ug usa ka gym sa Barangay Naalad.
Lima ka mga barangay ang gideklarar nga ubos sa state of calamity, matod ni Chiong sa mga reporter.
Kuyaw
Lugar diin nahitabo ang pagdahili sa yuta sa sitio Sindulan, Barangay Tinaan sa City of Naga, daan na nga gideklarar sa Mines and Geosciences Bureau nga kuyaw kaayo sa landslide.
Matod sa tigpamaba sa MGB 7, Marian Codilla, nga inisyal nga usa sa ilang gitan-aw nga posibleng hinungdan sa pagdahili sa yuta ang kusog nga pag-uwan sa Miyerkules sa gabii ug Huwebes sa buntag.
Giklaro usab sa OIC Regional Director sa MGB-7, Engr. Armando Malicse nga kadtong gipagawas nga findings nila ngadto sa kagamhanan sa Naga City niadtong Agusto 29 ning tuiga, kalabot sa nakitang panpanliki sa yuta sa may sitio Tagaytay, mga 700 metros ngadto sa usa ka kilometro ang gilay-on ngadto sa Sitio Sindulan diin nahitabo ang pagdahili sa yuta.
Ang maong liki, matod ni Malicse, gawas usab sa quarry site sa Apo Land and Quarry Corporation.
Ang findings nga giduso sa MGB-7, pinirmahan ni Atty. Gerardo Mahusay, ang chief sa Finance and Administrative Division.
“The crack reported to us, was investigated by virtue of the request of the local government unit. So we investigated it, our expert (geologist) went to the site and we found out that the crack in tgat particular sitio is a natural phenomena on a limestone formation, so it is not directly associated with the (quarry) operation, that is in sitio Tagaytay,” matod ni Malicse.
“What we have just done is to investigate if that crack (investigated on Aug. 29) is whether associated with the quarry operation, which incidentally is not. But even if it is not cause of quarry operation, our office still order the company to be extra careful especially in passing to that particular area'” dugang niini. Dugang taho nila ni JKV, GPL