SUGOD na sab ang kalbaryo sa Dabawenyo gumikan kay sugod karong adlawa ipatuman na ang rotational brownouts sa dakbayan ug sa mga kasikbit nga dapit.
Ang maapektuhan nga mga lugar sa brownout ilawom kini sa prangkisa sa Davao Light and Power Company (DLPC), subsidiary sa Aboitiz Power.
Ang 2 ka oras nga brownouts mahitabo sa tulo ka hugna sa gibahin nga mga lugar gikan sa alas 9 sa buntag hangtud na sa alas 9 sa gabii.
Ang rotational brownouts mahitabo gumikan sa gihimong preventive maintenance shutdown sa duha ka unit sa 210-megawatt (MW) Mindanao coal-fired power plant sa Steag State Power Inc. (SPI) sa Misamis Oriental.
Ang unang 105 MW unit sa SPI power plant gipailawom sa preventive maintenance gikan niadtong Pebrero 19 hangtud Marso 2 samtang ang ikaduhang 105 MW unit mahitabo karong adlawa, Pebrero 21, hangtud Marso 16.
Hinuon, di lang kita dinhi sa dakbayan sa Davao ang makasinati og mga brownouts ning panahona, kon di ang tibuok nasud Pilipinas.
Gani ang ubang bahin sa Visayas nakasinati na 4 ka oras nga brownout niadtong Huwebes.
Gikabalak-an nga mas mosamot pa ang kakuwang sa enerhiya gumikan kay panahon na sa ting-init kon diin mas daghan ang demand niini.
Busa angay kitang magdaginot sa kuryente ug gamiton kini sa saktong paagi.