KARONG nasinati na gyud ang pagkuwang sa enerhiya sa Sugbo, may dinalian ug kongkreto kaha nga masugyot ang grupo sa environmentalists sa pag-alibyo sa batakang panginahanlan sa enerhiya sa usa ka nagmalambuong dapit?

Dinhi sa Sugbo, daghang aktibong grupo ang dakong supak sa pagtukod sa power plant sa dakbayan sa Naga ug ubang bahin sa lalawigan kay makadaot sa kinaiyahan.

Click here for stories and updates on the Sinulog 2010 Festival.

Ang coal ug diesel-fueled plants gisupak sa mga environmentalist tungod sa giingong makadaot nga biya sa proseso sa planta, labina ang aso nga ibuga ngadto sa kawangan nga nakabuslot sa ozone layer - hinungdan sa climate change.

Samtang, ang tagduma sa mga planta sa Sugbo hugot nidepensa nga ninghimo sila og pamaagi sa ‘pag-minimize’ sa makadaot nga biya.

Nasayod kita nga ang Pilipinas di dakong magtatampo sa polyusyon nga hinungdan sa climate change sa kalibotan. Wa kini makatarog.

Hinuon, maayong mohimo kita sa atong kaulingong pagpanalipod sa kinaiyahan bisan sa kinagmay ug kinaugalingong lakang.

Sa nasinati nga sunodsunod nga brownout sa Sugbo karon naghatag og balidong timaan sa kabalaka sa mga tawo o grupo nga nagduso sa pagkatukod sa nahisgotang mga planta bahin sa kakuwang sa power taliwa sa nagkataas nga demanda mugna sa paspas kaayo nga paglambo sa Sugbo.

Sa hulga sa kakuwang sa eherhiya sa Sugbo, hagit kini sa liderato sa dakbayan ug lalawigan sa pagpangita og dinaling solusyon.