SUNOD-SUNOD nga mga trahedya ang natala dinhi sa nasud sukad nga mihapak ang bagyong Ompong.
Una kadtong landslide sa Itogon, Benguet nga mikalas og daghang kinabuhi kon diin hangtud karon padayon pa ang retrieval operation aron nga maugkat nga mga biktima nga natabunan sa yuta.
Samtang Huwebes, mikalas sab og upat ka kinabuhi ang nahitabong landslide sa Naga City, Cebu.
Nasayran nga ang lugar duol lang matud pa sa quarry site sa Apo Cement Company.
Pait palandungon nga mga biktima namatay sa ingon niini nga paagi nga wala damha.
Kining ingon niini nga hitabo di na talagsaon alang kanato, gumikan kay daghan nang higayon nga ato kining nasinatian, ilabi na gyud sa mga panahon magdaut ang panahon.
Gawas sa mga landslides, ngilngig sab ang epekto sa mga pagbaha nga dala sa mga pag-ulan.
Huwebes, gipahibawo sa Philippine Atmospheric Geophysical and Astronomical Services Administration (Pagasa) nga duha ka mga daut nga panahon ang namatikdan sa nasud. Hinuon ang usa posibleng matunaw lang.
Samtang ang usa maoy gikabalak-an kay posibleng maghatud kini og kadaut sa kayutaan kay mahimo kini nga bagyo.
Gibana-bana nga mosulod ang low pressure area sa Philippine Area of Responsibility (PAR) kon di man karong gabii, ugma sa buntag.
Matud sa Pagasa naa kini sa gilay-ong 2,345 kilometros sa sidlakang bahin sa Mindanao.
Huwebes sab, mibundak ang ulan sa pipila ka bahin sa dakbayan sa Davao gumikan sa epekto sa intertropical convergence zone (ITCZ) nga nakaapekto sa tibuok Mindanao.
Di na kita maghuwat nga duna pay mahitabong trahedya aron nga mahigmata kita. Karon pa lang daan mangandam na kita aron nga malikay sa posibleng mahitabong kadaut dala sa maut nga panahon.
Mga nahitabo sa atong palibot, maghatag unta kanato og leksiyon aron nga makat-on na ning panahona, ilabi na gyud kadtong mga nagpuyo sa daplin sa kasapaan ug sa kabukiran.