MACO, Comval Province -- Hustisya ang gisinggit sa pamilya sa security supervisor nga gipusil patay sa wala mailhing mga mamumuno sa Zone 2, Barangay Masara, alas 11:15 sa gabii, Miyerkules, Septyembre 19.
Biktima giila nga si Albert Bayo Catisay, 32, security supervisor sa Apex Mining Company, nagpuyo sa Purok Santol, Barangay Pindasan, Mabini sa nahisgutang probinsiya.
Segun sa imbestigasyon sa Maco Municipal Police Station, nasayran nga ang biktima naglakaw pauli gikan sa trabaho dihang mibutho ang tulo ka wala mailhing suspek.
Walay daghang istorya, gipusil sa mga suspek ang biktima sa makadaghang higayon hinungdan sa iyang kamatayon.
Mga suspek paspas nga miiktad paingon sa Barangay Poblacion, Mawab lulan sa duha ka mga motorsiklo.
Patay'ng lawas sa biktima gihaya sa St. Peter Funeral Parlor sa Tagum City, Davao del Norte.
Hangtud sa pagsuwat niining balita, blangko pa ang Maco Municipal Police Station sa pag-ila sa mga suspek sa pagpatay. (RSC)