BANSALAN, Davao del Sur -- Nalikayan sa usa ka pulis ang pagdunggab kaniya dihang gibadlong ang grupo sa mga batan-on nga nagyaga-yaga sa usa ka bayot.
Nahitabo ang insidente sa Minute Burger sa dalang Ramon delos Cientos sa Barangay Poblacion Dos, alas 3:30 sa kaadlawon, Huwebes, Septyembre 20.
Sa imbestigasyon sa kapulisan, nasayran nga si Police Officer 1 Joniemar Lumpas, nadestino sa Davao Occidental Police Provincial Office (DOCPPO) miabot sa lugar aron mokaon.
Apan naabtan niini ang grupo ni Jovan Kenth Antoque, 20, molupyo sa Sitio Curvada, Barangay Poblacion Uno.
Gibutyag ni Chief Inspector Rodante Varona, hepe sa Bansalan Municipal Police Office, nga lango sa ilimnong makahubog ang grupo sa suspek dihang giyaga-yagaan ang bayot apan dunay gitakin nga duha ka kutsilyo mao nga gisita ni Lumpas dungan sa pagpaila nga usa siya ka pulis.
Apan, inay mopatuo, ang kauban ni Jovan misuway pagduslak sa pulis ug maayo na lang kay nakalikay kini.
Nalahos ang kutsilyo ngadto sa tiyan ni Jovan hinungdan nga dali kining gidala ngadto sa Davao del Sur Provincial Hospital (DDSPH).
Nailhan sab ang mga nakasibat nga kauban ni Jovan nga sila si John Rey Lanzaderas, Leandro Caballero, Jonathan Monicar, Harold James Apsay, Aljo Paira, ug Syril Villanueva.
Gibalhin na ngadto sa Southern Philippine Medical Center sa Davao City si Jovan human nga way doktor sa DDSPH. (Orlando B. Dinoy)