MGA molupyo sa Dumoy, Toril, dakbayan sa Davao nakurat Huwebes, Septyembre 20, sa dihang giulan og mga lusok sa ice (ays) nga dunay gidak-on nga tunga sa “inch” nga diyametro nga di moubos sa usa ka oras, inubanan sa kusog nga ulan.
Apan wala hinuoy natala nga damyos sa maong hitabo.
Si Rodrigo Bustillo, Davao City Disaster Risk Reduction and Management Office operations officer, nagkompirma sa insidente nga nahitabo kagahapon didto lang sa lugar sa Toril bandang 1:30 sa hapon.
Gikanayon ni Bustillo nga kini ang unang higayon nga ang siyudad nakasinati sa maong insidente apan gitin-aw nga normal lang kini nga hitabo.
Ang kristal ays di peligro kay nagsukod lang kini og sama sa gidak-on sa lusok sa mais.
“Natural phenomenon na siya [nagpasabot] nga very low temperature ang atmospheric pressure so pag-mag-ulan ang uban nga tubig sa atmosphere ma-solidify before it reach in the ground that we called Hail storm,” tin-aw niya.
Ang Philippine Atmospheric Geophysical and Astronomical Services Administration (Pagasa) mipagawas Huwebes og pahimangno og Heavy Rainfall Warning signal No. 1 bandang alas 2:30 sa hapon tungod sa Intertropical Convergence Zone (ITCZ).
Ang Davao City, Maguindanao, North Cotabato, South Cotabato, Davao del Sur, Sultan Kudarat, Sarangani, Sulu ug Tawi-tawi gibutang sa “yello warning level” kon diin ang publiko ug ang disaster risk reduction and management council gitambagan nga mohimo og igong mga aksiyon.
Gisulti sa Pagasa nga ang lusok sa ays maporma pinaagi sa kombinasyon sa “warm, moist” ug “stormy” nga kondisyon sa panahon.
Kasagaran mahitabo kini kon ang pagpanalugdog kusog ug igo nga makagunit og “water droplets” nga taas sa “freezing level” aron maporma ang ays.