GITIN-AW sa Philippine Drug Enforcement Agency sa Autonomous Region in Muslim Mindanao (Armm) nga walay drug laboratories nga ilang nasuta karong mga panahona.
Matud ni PDEA-Armm Director III Juvenal Azurin, Regional Director nga sa pagkakaron negatibo ang gihatag nga impormasiyon nga adunay drug laboratory sa maong rehiyon.
“Sa ngayon po, wala kasi kung may existing dyan matagal na naming na dismantle, parati po kaming may nare- receive na report na ganyan that is a priority, it turns out that negative yung information,” pahayag ni Azurin.
Giingong aktibo usab ang partisipasiyon sa komunidad gani usa sa nagpakabanang katawhan ang nagtaho kanila kalabot na sa kalambigitan sa mga suspetsado nga nasikop niadtong Septiyembre 19, 2018 alas 3:00 sa kaadlawon sa White Flower St., Purok Mabuhay, Sitio Bacayo, Tubod, Iligan City.
Nagpahigayon usab ang PDEA-Armm og mga lecture o pag edukar sa komunidad ilabi na sa pag-ila kung aduna’y mga kadudahang mga patigayon ilabi na sa laboratory sa ilegal nga druga.
Kahinumdoman nga nasikop sa joint operation sa PDEA sa Amihanang bahin sa Mindanao, PDEA-Armm, ug uban pa ang kasamtangang Board Member sa Lanao del Sur nga si Hussien Magandia ug asawa nga si Norhaimah Magandia lakip usab ang anak nga si Aktar Magandia alyas Big boy, kanhi Kapitan sa Barangay Maguing Proper Lanao del Sur ug ang umagad nga si Amienquialed Dimal kinsa city councilor usab sa Marawi City.