GIKUMPIRMAR ni Misamis Oriental Governor Yevgeny Vincente Emano nga hayag na ug aduna nay mga kalamboan ang dagan sa kaso sa gipatay nga kapitan sa lungsod sa Jasaan nga si Danao Kapitan Alfredo Zapanta.
Kini tungod sa pagpangusog sa Task Force Zapanta sa pagpangulo ni Police Senior Superintendent Ronaldo Destura samtang nagpaabot sa resulta sa autopsy report.
Ulahing taho nga nadawat niini mao ang pag-ila sa tulo ka gidudahang suspetsado nga dakong tabang sa maong kaso.
“Naa nay gisunod atong kapolisan karon nga tulo ka mga suspek.”
Ang kamatayon ni Kapitan Zapanta niadtong Hulyo human gipusil sa tugkaran sa ilang panimalay ang usa sa labing gikasubo ni Emano gumikan kay matarong ug buotan kini nga amahan sa barangay.
Nagpabilin ang P200,000 nga reward money sa kinsa man nga makatudlo sa suspetsadong mipatay sa kapitan.
Kahinumduman nga P100,000 ang unang gitanyag nga reward sa kinsa man nga makatudlo sa mga suspetsado sa kamatayon sa kapitan apan tungod sa tinguha nga mapaspas ang pagsulbad sa kaso, nag amot-amot ang task force ug miabot sa P200,000 ang reward money. (SVB)