MIHANGYO ang kapolisan sa lungsod sa Tagoloan Police Station nga likayan ang pagmaneho kon adunay gihambin nga balatian.
Matud ni Chief Inspector Allan Oniana, hepe sa Tagoloan Police Station, nga likayan ang pagbiyahe nga mag-inusara hilabina kon dili maayo ang pamati sa lawas ug adunay gimintinar nga tambal.
Sa miaging adlaw, usa ka trailer truck ang nabangga sa usa ka pick-up sa Barangay Casinglot, lungsod sa Tagoloan, Misamis Oriental.
Gituohang giatake sa iyang sakit si Pelagio Anglonon, ang driver sa pick up, human kini mipaingon sa garahi sa usa ka residente sa dapit nga maoy hinungdan nasungag sab sa trailer truck nga gimaneho sa usa ka Richard Galula.
Giingong mopasaka og kaso ang pamilya sa nabanggaan tungod sa damyos human sa nahitabo. SVB