KAPIN P3 milyones nga ginadiling druga ang nakuha sa mga sakop sa Philippine Drug Enforcement Agency (PDEA)-Northern Mindanao atol sa pagpangronda sa balay sa usa ka board member niadtong Septiyembre 19, 2018 alas 3:00 sa kaadlawon sa White Flower St., Purok Mabuhay, Sitio Bacayo, Tubod, Iligan City.
Nasikop sa joint operation ang kasamtangang board member sa Lanao del Sur nga si Hussien Magandia, kinsa target sa search warrant, ug ang asawa niini nga si Norhaimah Magandia kinsa giingong ig-agaw sa nailang drug queen nga si alyas Marimar.
Lakip usab nga nasikop ang anak ni Hussien nga si Aktar Magandia alyas Big boy ug kanhi kapitan sa Barangay Maguing Proper, Lanao del Sur ug ang umagad nga si Amienquialed Dimal kinsa city councilor usab sa Marawi City.
Atol sa gipahigayong press conference, gibutyag ni PDEA-Armm Director III Juvenal Azurin nga konektado ang maong grupo sa mga dagkong sindikato.
“Ang drugs na kinukuhanan nila is somewhere in Manila, they have a contact in Bilibid nakakulong na so let’s say source, they travel it by land papunta dito sa part ng Lanao del Sur,” pahayag ni Azurin.
“Well as far as the supply is concern wala po sa bilibid ang supply, nagpa-facilitate lang po yung mga suspects na arrested,” pagtin-aw niini.
Nakuha atol sa search warrant nga gi-isyu gikan sa Kabacan, Cotabato ang mokabat sa 500 gramo sa gituohang shabu nga gibana-banang mokantidad og P3.4 milyones, kalibre 357 revolver, lima ka buhing bala, mga drug paraphernalia ug nagkadaiyang dokumento.
Samtang wala na nagpagawas og pahayag ang nahisgutang mga dinakpan.