LAHI ra gyud kon ang Cebu media na ang magpundok aron pagsaulog sa Press Freedom Week. Panaghigalaay, panagsandurot ug paghugoyhugoy ang mopatigbabaw sa mga kauban sa buhat.
Niadtong niaging Sabado, ang Entertainment Group nipahigayon sa pagpili sa Mr. & Ms. Press Freedom 2018. Tungod ba kaha kay ‘hanas’ na sa maong kalihukan, sa Messenger ra gyud nakasinabot ang mga sakop.
Tuod man, malampuson ang kalihukan ug napili ang taga Cebu Daily News ug taga The Freeman isip Mr. & Ms. Press Freedom 2018.
Sa mga mananaug ug sa mga kauban nako sa E-Group, mga pahalipay. Akong nahibaw-an nga nalipay usab ang mga sponsors ug tungod niana, dako ang purohan nga mosuportar gihapon sila sa kalihukan sa sunod nga higayon.
Daghang salamat sa pagsalig.
Niadtong Lunes, nakatambong ko sa gipahigayon nga 26th Cebu Press Freedom Week Opening Fellowship Party nga gihimo didto sa Oakridge Business Park sa A.S. Fortuna St., Mandaue City.
Nindot ang lugar, bugnaw kaayo (daghan ang nikuray kay wa makadala og jacket o kupo), lami ang pagkaon ug nagbaha ang ilimnon.
Sa gidalit nga cocktail drinks (Mojito, Melon Ball, Blue Margarita, Cebuana Sling, Red Lips, Flaming Shooter ug Threesome), ang melon ball ug blue margarita ang nainom.
Gikinahanglan ang mga ilimnon aron manginit ang lawas ug di mokuray sa katugnaw sa dapit. Lingaw ang mga duwa nga gipahigayon ni Rosemarie Holganza-Borromeo.
Ubay-ubay sa mga kauban sa buhat ang nakadaug og gift certificates sa Executive Lounge sa Oakridge Business Park ug ubang sponsors ug mga salaping Pilipinhon. Napulihan intawn ang giplite sa taksi. Hehe.
Karon ug ugma na lang ang nahibilin sa kasaulogan. Maghinamhinam na sab mi sa pagsaulog sa sunod tuig. Molungtad unta ang kagawasan sa media nga gipahimuslan karon.
Mabuhi ang Cebu media!
Daghan na ang akong nabasang komentaryo sa Facebook kalabot sa kadaghan sa yawyaw sa mga host sa It’s Showtime. Kini niresulta sa pagsobra sa gitagana nga oras alang sa maong programa.
Dihay kausa nga ganado pa unta si Vice Ganda sa iyang mga komedya (kadtong nanguyab kunohay siya ni Ate Jackie) pero gisanta kini sa pahinumdom nga posibleng mo-overtime sila.
Kalit nga niaslom ang dagway ni Vice ug human niyag basa sa pangutana sa Ms. Q&A contestant, iyang gigisi ang papel nga di niya sagad buhaton. Nabantayan usab kini sa mga tumatan-aw.
Kon magsigeg ingon niini ang dagan sa programa, di kaha mapul-an ang mga tumatan-aw?