SAMTANG nagkamulo pa ang mga rescuers sa pagkoykoy sa mga minero nga biktima sa landslide sa mga gagmay’ng mining sites didto sa Itogan, Benguet gumikan sa bagyong Ompong, lain usab nga susamang trahedya ang mi-igo dinhi mismo sa atong lugar. Kagahapon sa buntag, natugaw ang mga lomulopyo sa sitio Sindulan, Barangay Tinaan sa City of Naga human midahili ang bukid sa maong lugar. Gibana-bana nga adunay 15 ka mga paninalay ang natabunan sa yuta gikan sa midahili nga bukid. Sa pagsuwat nako ning maong lindog,nagpadayon pa ang mga rescue groups sa pagpahigayon og rescue, search ug retrieval operation. Aduna pay nabatian nga singgit sa mga biktima nga nangayo og tabang. Mga alas 10 sa buntag kagahapon, aduna nay na-rescue nga buhi ug ang uban patay nang nakoykoyan. Adunay nakalighot sa hitabo gumikan kay nakamata og sayo. Mga 5:30 nahitabo ang landslide diin daghan pa sa mga lomolopyo ang wa makamata. Pag-abot sa mga rescuers, ila pang nadunggan ang mga biktima nga misinggit. Taud-taud nangahilum na. Buot ipasabot patay na. Unsa-on kaha pagkabuhi no ilawom sa yuta.
Naglisod ang mga rescuers gumikan sa kataas sa yuta nga mitabon sa maong kumunidad. Gipa-agi lang nila og manu-manu nga rescue. Mga alas 9 kagahapon, nakasulod sa lugar ang backhoe sa Apo Cement nga mao usab ang nag-quarry sa maong lugar. Matod pa sa mga lomolopyo nga dugay na silang nabalaka sa kahimtang sa bukid kay nangliki na. Gumikan siguro sa sunod-sunod nga ulan mihumok ang yuta ug mibigay. Nahinumdom ko sa susamang trahedya nga nahitabo sa Guinsaugon, Southern Leyte pipila ka tuig na ang nakalabay. Mokabat sa libo ang wala na ma-ugkat.
Ang Mines and Geoscience Bureau (MGB) sa Department of Environment and Natural Resources (DENR) misuwat ni Naga City Mayor Kristine Vanessa Chiong niadtong Agusto 29 nga matod pa base sa ilang assessment di makahatag og kakuyaw ug pilegro sa mga lomulopyo kay ang mga liki natural ug di mugna sa quarry operation sa Apo Cement o Apo Land and Quarry Operation (ALQO). Unsay dili makahatag og pilegro sa ilang mata? (bobbygnalzaro@gmail.com)