LALAKENG nihigda sa nitso gipusil sa usa ka barangay tanod sulod sa sementeryo sa Lorega San Miguel pasado alas 6 sa milabay nga gabii.
Ang tanod mao usab ang gitumbok nga responsable sa pagpusil patay sa gidudahan nga kawatan diha sa barangay niadtong miaging Nobiyembre.
Ang anaa pa sa tambalanan tungod sa samad sa iyang aping giila nga si Richard Deluva, 29, usa ka drug dependent, apan taga brgy. Sambag 2, dakbayan sa Sugbo.
Ang suspek mao si barangay tanod Bryan Mabaga sa Lorega, kinsa gipangita sa kapulisan human giakusahang maoy nipatay sa usa ka suspetsadong kawatan niadtong Nobiyembre sa miaging tuig.
Sa pasiuna nga imbestigasyon nga gihimo nila ni SPO3 Rey Cuyos, PO3 Julius Mabunay, PO2 Michael Cudaste ug PO1 Nilo Aventurado sa Homicide Section sa Cebu City Police (CCPO), nisuroy ang biktima sa dapit ug nakig-inom sa iyang mga higala nga giila lang nga Eduardo ug laing duha pa sulod sa sementeryo.
Apan samtang sila nag-inom, kalit lang mi-brownout hinungdan nga sila niundang sa pag-inom.
Nipalabay siya sa panahon pinaagi sa paghigda-higda ibabaw sa nitso.
Wa makabantay si Deluva sa pag-abot sa suspek, kinsa niduol ug nipusil kaniya.
Pipila ka mga saksi ang ningtumbok sa suspek nga maoy nipusil sa biktima ug daling nipalayo sa lugar.
Nihimo og follow-up ang kapulisan, apan wa na nila masikop pa ang suspek, samtang ang biktima gidala sa tambalanan ug padayon pa nga giobserbahan.
Si Mabaga sa sayo pa gitumbok nga maoy nipusil patay sa usa ka gidudahan nga kawatan niadtong Nobyembre 2 sa milabayng tuig.
Sukad niadto wa na igkita sa kapulisan ang suspek.
Apan, usa ka tinubdan niingon nga dunay mga opisyal sa barangay nga protector sa suspek.
Lakip sa protector mao ang pipila ka mga pulis sa dakbayan sa Sugbo nga naglakip sa usa ka police official.
Apan way bisan usa ka opisyal sa barangay ang nitubag ning mao nga alegasyon bisan pa sa balikbalik nga tawag ning mantalaan human sa hitabo. (JFT)