MIKULIT og kasaysayan ang Cebu City Niños human sa ilang kalampusan sa duha ka kinaham nga sporting events sa nasod sa Batang Pinoy National Championships sa Baguio City kagahapon.
Ang Niños ningpatigbabaw sa girls’ basketball 5-on-5 ug mao kini ang labing unang nahimong kampiyon ning bag-ong event alang sa Under-15 athletes nga gidumala sa Philippine Sports Commission (PSC).
Naangkon sa Niños ang titulo pinaagi sa 72-62 nga kadaugan batok sa Pangasinan sa championship game sa St. Louis University Gym.
Kini maoy labing unang higayon nga giduwa ang 5-on-5 basketball sa kompetisyon. Kaniadto, ang 3-on-3 basketball ra maoy gilakip sa kompetisyon.
Pipila ka mga minutos human sa kalampusan sa babayeng mga basketbolista sa dakbayan sa Sugbo, ang volleyball boys naghari na sab sa ilang kaugalingong tahas.
Gitangtangan sa Niños og bakus ang defending champion Davao del Norte pinaagi sa 25-16, 25-18 nga kadaugan sa Recoletos Gym.
Usa kini ka tam-is nga panimalos sa Niños batok sa Davao del Norte nga maoy nagpukan kanila sa finals sa miaging duha ka mga tuig sa Tagum City, Davao del Norte.
Alang kang Cebu City basketball coach Edilio Abellanosa, ang ilang kalampusan gasa gikan sa milagrosong bata nga Sto. Niño.
“This is really a blessing. We got lucky since yesterday (Huwebes),” matod ni Abellanosa sa interbyu sa Sun.Star Cebu.
Gitumbok ni Abellanosa ang ilang kulbahinam nga kadaugan batok sa Cebu Province niadtong Huwebes. RSC, ESL