Mat Centeno niapil na sad og contest

MANILA - Kon buot hunahunaon, usa na ka celebrity si Matmat Centeno tungod kay First Runner-up siya sa first Miss Q and A sa It’s Showtime.

Celebrity na siyang matawag tungod kay daghan nang raket ug guesting karon si Matmat. Pero wala mohunong si Matmat sa pagsalmot og contest. Sa kasamtangan, usa si Matmat sa contestant para sa Redvocates, diin nangita sila og ambassadors Against HIV and AIDS.

Taud-taud na akong nag-cover ug nagkalain-laing pageants pero lahi kining maong pageant tungod kay tulo ang category: ang male candidates, female candidates ug ang Transwoman candidates ug naapil dinhi si Matmat.

Napu ka contestant sa matag category. Bongga ang maong project tungod kay ang Department of Health ug si Miss International Kylie Versoza ang nagpasiugda ug nagpaluyo niini.

Didto nako nasuta kon unsa kahanas motubag ni Matmat, mapa-English man o Tagalog, very eloquent siya ug klaro ang iyang tingog.

Sa usa ka pangutana, medyo nakahilak pa si Matmat tungod kay daghan na diay siyang nga “anak-anakan” nga namatay gumikan sa AIDS. Mao nga sa edad niyang 43 ug bisan celebrity na ang estado pero nisalmot siya sa maong contest tungod kay gusto niyang mamahimong tingog sa mga LGBT community regarding sa AIDS Awareness.

Gipangutana ko ang 30 candidates nga since kabahin sa AIDS ang ilahang advocacy, nakapatan-aw ug nagpa-AIDS test na ba sila? Una kong nakita si Matmat nga niisa sa iyang kamot, daghan sad nga mga lalaking contestant ang niisa ug sa Transwoman category. Apan dyutay lang sa female candidates.

Niboto kami for Darling of the Press (sa tulo ka category) ug sa Male Category. Ang nidaug mao si Jearu Ed Magbuhat of Batangas, sa Female naman si Patrixia Santos sa Daraga, Albay ug sa Transwoman Category, siyempre si Matmat Centeno from Cabanatuan City pero nagtubo sa Samar.

Sa September 28 na ipahigayon ang grand coronation night sa MOA Arena.