NIDUYOG kita sa kasakit sa mga pamilya nga nagbangutan diha sa Barangay Tinaan sa ciudad sa Naga gumikan sa wa damha nga pagtaliwan sa ilang mga minahal sa kinabuhi mugna sa dakong katalagman nga ilang nasinati niadtong Huwebes.
Ato sab nga giila ang bayanihong buhat nga gitunol sa mga rescuers kauban ang medical team nga nirisgo sa ilang kinabuhi atol sa search and retrieval operation.
Susamang simpatiya ang gusto natong ipaabot ngadto sa mga nagbangutan nga pamilya sa lungsod sa Itogon lalawigan sa Benguet kansang mga minahal sa kinabuhi nakalas sa usa ka makalilisang nga landslide tungod sa subsub nga ulan nga nasinati atol sa pagpanghasi sa bagyong Ompong sa dakong bahin sa atong nasod.
Sa atong asoy sa niaging Lunes naghisgut ko nga mag-adtoan ko sa maong lungsod niadtong dekada 80 tungod kay may ig-agaw ko nga nagtrabaho sa minahan diin nahitabo ang landslide.
Sa akong pakisusi taudtaud na nga nipahawa ang akong ig-agaw sa maong minahan kuyog ang iyang pamilya.
Hinuon may mga paryente pa gihapon nga nagtrabaho didto ang habig sa iyang asawa nga lumad nga taga Itogon.
Bisan sa kadugay na sa panahon daw lab-as pa gihapon sa akong panumduman ang hulagway sa maong minahan nga akong nasuroy sa makadaghang higayon atol nga nagtrabaho pa ko sa Baguio City isip usa ka purchaser sa usa ka patigayon nga gipanag-iya og taga Sugbo.
Sa akong gidugayon didto ang landslide komon na kaayo nga panghitabo nga giantos sa mga molopyo. Pero ang nahitabo karon nagkinahanglan og makuting pagtoon unsaon nga di na kini masubli.
• • •
Nagpadayon ang imbestigasyon sa nahitabo sa Tinaan.
Naglaum ta nga ang resulta sa imbestigasyon maoy maghatag og tukma nga tubag sa mga pangutana nga posibling nag-ung-ung sa inyong mga hunahuna.
Apan karon pa lang gusto tang mangutana nga gawas sa Tinaan unsa pay laing mga lugar dinhi sa ato nga nakasinati og di maayong epikto sa subsub nga mga pag-ulan sa nakalabayng mga adlaw?
Kumusta man ang monitoring nga gihimo sa mga tinugyanan sa Disaster Risk Reduction & Management Council sa matag munisipyo, city hall ug kapitolyo? Kontento na ba sila sa report nga gipadangat sa mga barangay kapitan? Basin dunay report ang mga kapitan nga gikinahanglan og dinalian nga pakisusi? Ang mga molopyo diha sa mga sitio niapil ba sab mo pagpaniid sa inyong palibot?
Wa bay mga talimad-on sa posibling pagdahili sa yuta? Mga pangutana kini nga angayng patalihunghugan.
Di tungod kay niundang na ang mga pag-ulan sa inyong dapit mo-relax nalang sab ta sa pagpaniid.
Ilabi na mga dapit nga giila nga delikado ang landslide angayan nga kini tutukan. Di maayo nga makontento ra ta sa ka usa o ka duha nga pakisusi.