Albor: Revolution ilusad?

KON ang kasamtangang gobyerno dunay gustong mogun-ob, ang katawhan sa nasod mabahin-bahin. Motumaw ang rebolusyon. Naay habig sa gobyerno ug naay mobatok sa gobyerno. Panahon ni Pres. Ferdinand Marcos gamay nalang ang mituo sa iyang rehimen.

Nagrebolusyon ang katawhan pinaagi sa people power nga naghingilin ni Marcos. Si Cory Aquino nga mao nay presidente mideklarar og revolutionary government nga nagtudlo og mga officer in-charge. Lahi kining sitwasyon ni Pres. Rodrigo Duterte kay ang Magdalo group ni Sen. Antoinio Trillanes nakig-alayon sa LP ug mga rebelding komunista aron pagpukan sa administrasyon.

Giplano na ang destabilization plot. Naminte sa kasuko si Duterte posibling ilusad ang revolutionary government aron dili mahaw-ang ang kagawasan, kaangayan, kahiusahan sa samang higayon dili magum-os ang demokratikanhong katungod sa katawhan. Sa rebolusyonaryong panggobyerno maoy gobyerno nga sa daklit wala nay gobyerno. Samag rag gipalagpot sa presidente ang iyang kaugalingon sa katungdanan ug unya iinstalar ang iyang gahom nunot sa pag-abag sa military hunta. Itudlo ang mga officer in-charge sa kalungsoran, dakbayan ug lalawigan.

Daghang mamayor nga wala moagi og eleksyon. Walay probisyon sa batakang balaod nga naghisgot sa pagdeklarar og revolutionary govt. apan dunay katungod ang presidente sa pagpanalipod sa estado.

Ubos sa revolutionary government ang pangulo mao na ang moluwat sa mga balaod ug magbuot sa tanan sa pagdumala sa nasod. Magamit ang pagsilot sa mga moalkontra kay ang pangulo mao may maglatid sa balaod subay sa batakang balaod. Kay anaa naman sa pangulo ang gahom sa pagmando ug pagdiktar iyang pilion ang sistema sa gobyerno nga gusto niyang ipatuman. Kini hinoon maghatag sa katumanan sa iyang gidamgo nga plataporma padulong sa Federal System of govt. nga magbahig sa nasod ngadto sa 18 ka mga estado nga mabahin ang buhis alang sa makiangayon nga kalamboan ug maminosan ang naghitak nga kurapsyon.

Sa dili pa ang federalismo retokihon pa ang Batakang Balaod sa mga sakop sa Constitutional Commission o Consultative Committee pag-abag sa kongreso aron kini itugyan sa katawhang Pilipino pinaagi sa referendum. Sa pederalismo, naa na ang buhis sa estado. Motampo sa mga gastohan sa nasod ug ang sobra tungaon sa estado ug national federal. Dili sama karon nga 20 porsento ra nga IRA ang mahibalik sa lokal.

(csa_1156@yahoo.com/09064648954 csa_1156@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph