ANDAM na makigtigi ang 32 ka tim sa boys dibisyon ug 16 tim sa girls event sa Samahang Basketbol ng Pilipinas (SBP) 3x3 Under 16 adlaw’ng Sabado, alas 9 sa buntag hangtud ugma, Septyembre 23 sa Felcris Centrale Alfresco Activity Center.
Gibutyag ni SBP executive program office Ronel Leuterio nga gihimo ang programa aron daghan pang magduduwa ang madiskubre ilabi na sa mga pambulikong eskuwelahan diin defending champion sa nasyonal finals sa babaye nagagikan sa Davao ug pampublikong eskuwelahan nga Cabantian National High School (CBNHS).
"We take pride on that one because we focus on public school. SBP is urged to hold programs like the 3x3 since it is already an Olympic sports and is now included in Palarong Pambansa," pahayag niya atol sa presscon didto sa The Royal Mandaya Hotel ning siyudad Biyernes, Septyembre 21.
Mga tim nga moduwa sa liga mao ang boys defending champion Davao Jones Academy (DJA), Ateneo de Davao University (Addu), Assumption College of Davao (ACD), Holy Child College of Davao (HCCD), Ford Academy of the Arts (FAA), Emar Human and Environmental College (Ehec), Jose Maria College (JMC) ug Lamb of God Sped Academy (LGSA).
Samtang modugang sa listahan ang kanhi kampeyon nga Daniel R. Aguinaldo National High School (DRANHS) sa torneyo nga gi-organisa ug gisuportahan sa SBP.
Bahin ni SBP committee Billy Cruzada misulti nga ang format sa girls event gitunga sa upat ka bracket nga magkontra sa single round robin ug ang manguna maoy abante sa semifinals padulong kampeyonato.
Samtang sa lalaki, gibahin sa walo ka bracket nga dunay 4 ka tim diin magharong sa single round ug top 1 tim mosibog sa quarterfinals knockout hangtud sa finals.
Ang modaug sa matag dibisyon makadawat og premyong P10,000 ug maoy mopresenta sa Davao region alang sa nasyonal finals sa Oktubre samtang P3,000 ug P2,000 alang sa sunod nga duha ka puwesto.
Una magsugod ang kompetisyon, dunay pagahimuon nga orientation alas 8 sa buntag.