DEAR Noy Tikyo,
Tawga lang ko og Xemxem, 30 years old na. Ang akong problema, Noy, bahin ning akong tinguha nga motungha. Kutob ra man god ko og 2nd year college sa una. Unya miundang kay namatay ang akong ginikanan sa aksidente.
Mao tong nangita na lang ko og trabaho hangtud nga nadawat ko. Hangtud karon nia pa gihapon ko sa akong gitrabahoan.
Karon kay nakahunahunaa lagi ko nga tapuson ang akong kursong civil engineering kay single pa man gihapon ko. Walay problema ang akong boss kay misaad man siyang mosuporta kuno nako kon makahukom kong moeskuwela.
Apan ang akong problema, Noy, kay mauwaw man ko tungod sa akong pangedaron. Segurado kong ang akong ikauban karon ang mga millennials na.
Di ba kaha ko nila kataw-an?
Xemxem
*****
Xemxem,
Kon determinado gyud kang motapos sa imong kurso, di nimo kini ikauwaw. Wa say mokatawa nimo, kay maka-inspire pa gani ning imong buhaton.
Di na kini talagsaon karon kay daghan na kitang nadungog nga balita nga mas maguwang pa gani nimo og edad, mitapos og kurso. Ang uban nila nahimong abogado. So di kini imposible nimo nga edad pa lang og 30 anyos.
Kon mao gyud ang imong hilig ug tinguha, nganong di god. Puwede kang moadto sa school nga buot nimong eskuwelahan sama pananglit sa guidance counselor, aron nga magiyahan ka sa angay nimong buhaton.
Tingali, haum kaayo kining imong plano gumikan kay suportado ka man sab sa imong gitrabahoan karon. Kay basin og ang matang sa imong trabaho karon nahaum sa kurso nga imong kuhaon.
So, pahimusli ang panahon mintras nga ulitawo ka pa ug mahimo mo pang moeskuwela. Kay dunay daghan diha nga tinguha nga moeskuwela apan di makahimo kay kuwang sa panalapi ug di na sab kaya sa ilang lawas.
Ayaw ikauwaw kini gumikan kay sa imo man kining kaayohan. Gawas pa mas himuon ka pa unyang panag-ingnan sa uban kon molampos ka.
Noy Tikyo