DUNAY gibansay karon ang 3rd Infantry Battalion (IB) sa Philippine Army nga mga bag-ong rekrut aron himuong Special Citizen Armed Forces Geographical Unit (Cafgu) Active Auxiliaries kun SCAA.
Gisugdan ang ilang Basic Military Training niadtong Miyerkules sa headquarters sa 3rd IB didto sa Malagos, Calinan.
Ang SCAA gitahasan nga moabag sa tropa sa kagamhanan sa pagprotekta diha mismo sa ilang mga barangay batok sa nagkadaiyang hulga kay sinati man nila ang kaugalingon nilang komunidad.
Ipailawom sila sa 45 ka adlaw nga pagbansay aron tun-an ang operasyon sa law enforcement. Human sa pagbansay, duha ka kompanya ang ipakatag sa ikatulong distrito samtang ang laing usa idestino sa ikaduhang distrito.
Gilauman nga mga bag-ong rekruts modugang sa puwersa sa pulis ug sundalo sa pag-alkontra sa mga hulga sa terorismo ug insurhensiya.
Di na ikalimod nga mga SCAA, ug mga barangay tanod o pulis nakatampo og dako sa paghatag og seguridad sa katilingban.
Apan di malikayan nga dunay pipila sab nga imbis nga makatabang sa komunidad, mao pa hinuoy numero unong badlungon.
Gani dunay pipila ka mga pulis ug sundalo, nahimo na hinuong scalawags sa ilang han-ay, imbis nga makatabang.
Unta, ang mga bag-ong bansay nga mga SCAA motamod sa ila unyang panumpaan nga tahas nga pag-alagad ug pagprotekta sa katawhan ug gamiton ang ilang nakat-onan sa maayo ug di sa dautan.