MAGSAYSAY, Davao del Sur -- Hugot nga seguridad ang ipatuman sa kapulisan ug militar atol sa pagsugod sa usa ka semanang selebrasyon sa “Kialegnon Festival” karong adlawa, Septyembre 22.
Gibutyag ni Senior Inspector Cris Ian Taghap, hepe sa kapulisan sa Magsaysay Municipal Police Station, nga moabag sab kanila ang mga force multipliers sama sa mga barangay tanod ug barangay police auxilliary team (BPATs) gawas nga anaa ang puwersa sa 39th Infantry Battalion, Philippine Army ug mga Citizen Armed Forces Geographical Unit (Cafgu).
Magpatuman ang kapulisan og checkpoint ug patrolya sa mga lugar diin anaa ang mga aktibidades.
Gisulti ni Mayor Arthur Davin nga apil ang tanang mga opisyal sa barangay sa pagahimuong selebrasyon.
Nakasentro ang selebrasyon sa kultura ug tradisyon sa mga lumad diin ang ilang mga duwa sa tribu maoy himuon sa mga kontes.
Aduna say indigay sa mga maanyag nga dalagang sakop sa nagkadaiyang tribu diin magpakita sa ilang talento karong Septyembre 24 una ang koronasyon sa Hiyas ng Kialeg sa Septyembre 26 sa gabii.
Giangkon ni Davin nga wa silay kompiyansa sa seguridad tungod sa hulga sa terorismo apan gipasalig niini sa publiko nga gihimo nila ang tanan aron mahimong luwas ang matag usa.
Samtang ang kapulisan nag-awhag sa katawhan nga angayang motabang sa pagpaniid sa palibot ug motaho dayon kon adunay mga katingad-ang tawo o butang sa ilang duol.
Ang Kialegnon Festival mao ang tinuig nga pasalamat sa tanang tribu sa ilang abundang abot sa umahan.
Gidasig sa lokal nga gobyerno nga mosaksi ang ilang mga molupyo ug mga bisita sa nagkadaiyang pasundayag. (Orlando B. Dinoy)