NAPUNO ang Freedom Park sa Roxas Avenue, Davao City sa mga militanteng pundok, diin ilang gisinggit ang pagpahunong sa martial law sa Mindanao subay sa paghinumdom sa ika-46 ka tuig kasumaran sa martial law sa Pilipinas sa reheming Marcos, Biyernes, Septyembre 21.
Gisinggit sa mga militanteng pundok ang pagpahunong sa kasamtangang martial law ni Pangulong Rodrigo Duterte sa Isla sa Mindanao.
Sumala sa mga progresibong pundok nga wala suma pa'y kalahian ang martial law niadto ug martial law karon sanglit giingong gidumala gihapon kini sa kabangis gumikan sa padayong pagpamatay suma sa grupong Pasaka.
Sa laing bahin, duna say mga pro-martial law nga nagpasibaw sa ilang bahin diin ilang gibalandra sa ilang mga placards nga ang martial law mao ang naghatag og tinuod nga kalinaw sa Mindanao.
Gisinggit sab nila sa laing bahin nga ibagsak ang CPP-NPA-NDF kinsa mao suma pa'y naghatag og kagubot sa nasud.
Gitawag sab nila nga mga berdugo ug terorista ang mga rebeldeng New People’s Army.
Hinuon sa duha ka paksyon sa welga, mipatunga ang kapulisan ug kasundalohan alang sa pagpabilin sa kahapsay ug kalinaw sa paghandom sa martial law, Biyernes sa Davao City. (Jeepy P. Compio)