TAGUM CITY -- Pormal na nga milingkod ang bag-ong National Bureau of Investigation (NBI) provincial officer sa Tagum City, Biyernes, Septyembre 21.
Sa simple nga seremonya, mismong si NBI director Dante Gierran ug mga lokal nga opisyal sa Tagum City ang misaksi sa paglingkod ni NBI-Davao assistant regional director Jonathan Balite isip provincial officer.
Nagpasalamat si Balite sa kahigayonan nga gihatag kaniya isip mangulo sa NBI-Davao nga nakabase sa Tagum City nga mosakop sa Davao Del Norte, Compostela Valley Province ug Davao Oriental.
Gipasalig ni Balite nga ipadayon ang maayo’ng nasugdan sa maong buhatan subay sa mandatu ni Pangulong Rodrigo Duterte labi na sa kampanya sa pagbatok sa ilegal nga droga.
Sa mensahe sab ni director Gierran iyang gipahimangnoan ang iyang mga officers ug mga kaubanan sa NBI Tagum nga himuon ang husto nga mga tahas nga gipanghatag kanila subay sa mandatu sa NBI.
Gihagit sab ni Gierran si Balite ug ang mga kaubanan niini diha sa pagpadayon sa mga kamandoan sa Pangulo alang sa tinud-anay nga pagserbisyo sa katawhan. (Ritche Nalagon)