PADAYONG gipangita sa kapulisan sa Davao City Police Office (DCPO) ang giingong 14 ka mga lalaki nga dunay dalang armas sa Barangay Matina Pangi, Davao City.
Kini subay sa duha ka mga nadakpan Biyernes sa buntag, Septyembre 21, nga gituohang mga sakop sa rebeldeng New People’s Army (NPA) sa Purok 3, Barangay Langub, Maa ning dakbayan.
Ang duha giila sa kapulisan nga sila Jimmy Duran Lucob, 26, construction worker; ug si Raquelyn Moda, 19, taga Caburan, Davao Occidental.
Mihimo og operasyon ang kapulisan human ilang nadawat ang impormasyon nga naay mga gituohang sakop sa NPA sa Lucob residence, hinungdan nga mihimo og operasyon ang DCPO.
Atol sa operasyon, nakuha sa posisyon sa duha ang live fragmentation grenade ug mga nagkadaiyang subersibong dokumento ug usa ka unit sa homemade caliber 3516 revolver ug dunay naka-drawing nga mapa alang sa ilang mga targets.
Dihang natimahoan ang presensya sa kapulisan, namatikdan ang dul-an 14 ka mga lalaki nga dunay dalang armas ang daling nanibat padung sa kakahuyan sa Brgy. Matina Pangi.
Nagtuo ang kapulisan nga mohimo og kasamok ang mga NPA sa siyudad kung wala kini napakgang. (Jeepy P. Compio)