KIBLAWAN, Davao del Sur -- Samaran nga gipanghatud ngadto sa bay tambalanan ang duha ka menor de edad nga lalaki human gipamusil sa wala mailhing suspek, alas 12 sa udto, niadtong Huwebes, Setpyembre 20.
Nailhan ang mga biktima nga sila si alyas Boy, 13, ug silingan niining si Toto, 5, pulos molupyo sa Sitio Bantong, Barangay Kimlawis.
Sa imbestigasyon ni Police Officer 1 Erick Sotomayor, nasayran nga naigo si Boy sa walang bahin sa paa samtang si Toto sa tuong kamot.
Matud ni Sotomayor nga nagduwa ang mga bata og holin gawas sa ilang balay dihang kalit milanog ang buto sa armas gikan sa wa mailhing mamumuno.
Daling midagan ang mga menor aron motago sa kawayanan pipila ka metros gikan sa balay ug dali sab nga misibat ang namusil.
Ang amahan ni Boy nga nananggi og mais niadtong higayona miresponde dayon aron dalhon ang anak nga si Boy ug kaduwa nga si Toto ngadto sa Gregorio Matas District Hospital.
Di pa masulti ni Sotomayor ang motibo sa krimen ug kinsa ang mga suspek samtang padayon ang imbestigasyon sa nahitabo.