GIPAHUNONG sa Kapitolyo ang tanang matang sa quarry operations sa tibuok lalawigan sa Sugbo.
Quarry ra ang masuspenso sa mga local government unit (LGU) kay ang mining ubos man sa Mines and Geosciences Bureau (MGB) sa DENR.
Dungan niini, gimando usab ni Gob. Hilario Davide III sa Provincial Environment and Natural Resources Office (PENRO) ang pag-inspeksiyon sa tanang site sa quarry operation nga nahatagan nila og permit.
Si City of Naga Mayor Kristine Chiong nimando usab sa paghunong sa tanang quarry operations sa iyang siyudad sa usa ka memorandum nga iyang giluwatan kagahapon nunot sa landslide sa Barangay Tina-an.
Matod sa gobernador, paagi kini aron kapugngan ang susamang trahedya, nga nikalas og daghang kinabuhi sa brgy. Tinaan.
Giklaro hinuon sa gobernador nga way labot ang Kapitolyo sa operasyon sa cement company nga giingong responsable sa pagka-opaw sa bukid duol sa landslide site sa Naga, sanglit ang Department of Environment and Natural Resources (DENR) ang naghatag kanila ug pagtugot.
Sigun sa opisyal, ang kompaniya dunay Mineral Production Sharing Agreement (MPSA) tali sa maong ahensiya.
Way timeline nga gihatag ang opisyal kon hangtud kanus-a ipatuman ang maong suspensiyon.
Dungan sa pagpahunong sa operasyon sa tanang quarry operation sa probinsiya sa Sugbo, gimando usab ni Davide kang PENRO Chief Jayson Lozano ang pag-inspeksiyon sa tanang quarry site nga nahatagan nila Og permit aron pagsuta kon dunay risgo sa dapit.
Ipa-review sab niya ang tanang na-isyu nga permit.
Ang Penro nakahatag og 35 ka permits.
Kini naglangkob sa Talisay diin dunay 2; 2 sa Minglanilla, 7 sa Naga, 2 sa San Fernando; 2 sa Argao; 1 sa Dalaguete; 3 sa Alcantara; 4 sa Consolacion; 2 sa Compostela; 2 sa Danao City; 2 sa Carmen; 1 sa Tabogon; 2 sa Medellin; 2 sa Pinamungajan ug 1 sa Asturias.
Matod sa gobernador nga sagad sa mga nag-operate og quarry site anaa sa habagatang-kasadpang Sugbo.
Sa pag-isyu unya sa Kapitolyo og permit alang sa susamang kalihukan, gitumbok ni Davide nga basehan nila ang geohazard map nga anaa sa Provincial Disaster Risk Reduction and Management Office. (AZLG, dugang taho nila ni Femarie Dumaboc ug GPL)