NAGPINIRMAHAY sa Memorandum of Understanding ang Department of Veterinary Medicine and Fisheries (DVMF) sa dakbayan sa Sugbo ug Humane Society International (HIS) alang sa libre nga house-to-house anti-rabies vaccination sa 80 ka mga barangay sa dakbayan sa Sugbo.
Kini gipahigayon sa executive office sa City Hall alas 10 kagahapon sa buntag.
Mokabat og 130,000 ang populasyon sa iro sa dakbayan sa Sugbo, matod sa gipahigayon nga survey sa HIS.
Ang tumong sa proyekto mao ang pagkab-ot sa 2020 “Zero rabies cases” na ang dakbayan sa Sugbo.
Matod ni Dr. Alice Utlang, pangu sa DVMF, ang HIS ang nagbuhat ug naghatag sa usa ka application nga motabang sa pag-ila ug pagtultol sa tag-iya sa iro.
Ang application gitawag nga Mass Dog Vaccination (MDV) application diin kada pagbakona sa iro, kuhaan kini og litrato, ilhon kini kon baye o lake.
Pangayuon pod ang address sa tag-iya niini aron dali matultolan ang balay sa tag-iya kon mahitabo nga ang ilang iro nakapaak og tawo.
Dugang pa ni Utlang nga dako kaayo og tabang ang MDV application sa HIS tungod kay aduna nay impormasyon ang kada barangay sa syudad sa Sugbo labot sa pila kabuok ang iro kada balay, gender sa mga iro ug mailhan pod kon nabakonahan ba kini o wala.
Batbat ni Utlang nga adunay ipahigayon nga educational campaign sa mga tag-iya sa iro labot sa mga balaod nga dapat tumanon aron mahimo silang responsable nga mga tag-iya.
“Plus educational campaign kay kung mag sige gihapon ta ana kita ray mutrabaho sa gobyerno without the help sa mga tag-iya sa iro lisod kaayo na kab-uton.” saysay ni Utlang. Maria Jenesis Empasis, CIT-U Intern