MAISUGON nga miangkon ang direktor sa kapulisan sa Central Visayas atubangan sa mga opisyal sa Cebu Citizen Press-Council (CCPC) nga adunay mga pulis nga badlungon nga padayon niyang gipanid-an ug tinguha nga taktakon sa serbisyo.
Si P/CSupt. Debold Sinas ang pinasidunggang dinapit atol sa ika-48 nga CCPC quarterly meeting diin naghisgot kini sa iyang istilo sa pagdumala sa kapulisan sa Central Visayas.
Usa sa mga gipangutana kaniya kon unsa na ang kahimtang sa mga pulis sa rehiyon atol sa administrasyon ni Presidente Rodrigo Duterte.
Giangkon niya nga aduna pay mga pulis nga badlungon apan gipaubos na sa monitoring ug ang uban nasikop na human maaktohi nga naghimog krimen ug nag-atubang nag dismissal proceedings.
Gipasalig sa heneral nga andam siya nga mohawa sa PRO 7 kon adunay mahibaw-an ang media nga siya midawat og kwarta gikan sa ilegal nga drugas ug ilegal nga sugal.
“If anybody of you will pinpoint nga kana si General Sinas nagdawat na og protection money in drugs, in illegal gambling and smuggling and any politicians right there and then, ill get out of Cebu,” matod ni Sinas.
Sa iyang pag-abot sa Sugbo mao, matod pa, kini ang mando sa iyang mga labaw sa Camp Crame nga di mohimo og ilegal nga kalihukan sanglit ang kwarta nga gikan niining maong mga tinubdan hugaw.
Di siya makatugot nga mahimong hugaw usab ang tanang pulis sa Central Visayas. AYB