UPAT sa dakong officials sa Mines and Geosciences Bureau (MGB) 7 ang giparelibuhan sugod kagahapon.
Kini human gipahibawo mismo ni Dept. Of Environment and Natural Resources Secretary Roy Cimatu human sa iyang pagbisita ug pagsusi sa lugar nga nadahilian sa yuta.
Sa mga alas 3 sa hapon, niabot og 29 ang gidaghanon sa nangamatay, apan nianang mga alas 5, nisaka na kini ngadto sa 33.
Walo usab ka mga tawo ang nangaangol ug mga 60 ang missing pa.
Ang gipangrelibuhan mao sila si MGB 7 Regional Director Loreto Alburo, Atty. Gerardo Mahusay, chief sa Finance and Administrative Division, kinsa mao usab ang nipirma sa memorandum nga gipada ngadto kang City of Naga Mayor Kristine Chiong niadtong Agusto 29 kalabot sa giingong luwas ra nga mopahigayon og quarry ang Apo Land and Quarry Corporation bisan sa mga nakitang pagpangliki sa sitio Tagaytay, Barangay Tina-an, dakbayan sa Naga.
Laing duha nga girelibuhan mao ang supervising geologist nga si Dennis Aleta ug Chief geologist, Al Emil Berador.
Gipasabot ni Cimatu nga wa kini nagpasabot nga gihukman na sila nga sad-an, apan kini aron sa paghatag og patas nga imbestigasyon.
Dugang ni Cimatu nga mopada siya’g fact-finding team nga gikan sa ilang ulohang buhatan aron maoy mohimo sa imbestigasyon sa landslide niadtong Huwebes sa buntag, pag re-assess sa geohazard map sa dakbayan sa Naga, kon unsa pang mga lugar ang kuyaw sa pagdahili sa yuta.
Way klase
Si City of Naga Mayor Kristine Chiong nisuspenso sa mga klase sa tibuok siyudad sugod kagahapon, matod ni City Council Secretary Garry Cabotaje sa Superbalita Cebu.
Kini taliwa sa pagpabakwit sa mga lumolupyo nga apektado sa landslide sa Barangay Tina-an.
Si Cabotaje niingon nga wa pa siya masayod kon kanus-a libkason ang suspension sa klase samtang gigamit nga evacuation centers ang pipila ka mga tunghaan.
Matod niya mokabat sa 897 ka mga pamilya kun 2,836 ka mga tawo ang apektado sa katalagman.
Si Chiong, sa iyang bahin, nipahibawo nga gawas sa existing lima ka mga evacuation centers, himuon na usab nga temporaryong kabalhinan sa pamilya ang mga tunghaan nga nakapalibot sa lugar.
Duterte miduaw
Si President Rodrigo Duterte, kinsa niduaw sa dakbayan sa Naga kagahapon sa hapon aron pagsusi sa kahimtang sa mga apektado sa landslide, nisaad usab nga ang kagamhanan moabaga sa galastuhan sa pagpaospital ug paglubong.
Iya usab nga giseguro sa mga biktima nga sila pabalhinon ngadto sa usa ka luwas nga dapit kay di na sila pabalikon sa ilang dapit nga giilang kuyaw sa landslide.
Matod niya nga sila si Chiong ug Cebu Governor Hilario Davide III nag-estoryahanay na kalabot sa relocation.
Ang kagamhanan nitumbok na sa lote nga gipanag-iya sa Provincial Government ug nahimutang nga way usa ka kilometro gikan sa Barangay Tina-an.
“Ang mayor mismo dili na musugot nga mobalhin mo didto. Ang inyong gobernador niingo’g delikado. So si General (Roy) Cimatu ug si General (Eduardo) Año ingon sila nga, ‘Dili na gyud na sila makabalik.’ Dili tungod nga gusto nilang samuk-samukon inyong kinabuhi kung dili para matagaan mo’g proteksyon,” matod ni Duterte.
Matod niya nga iya usab nga gitan-aw nga hunongon ang pagmina dinhi sa nasod sa di pa siya mokanaug.
“Ibawal nato na. That’s the only way nga akong buhaton una ko munaog pagkatrabahante sa gobyerno,” siya niingon.
Iyang gibasol ang pagmina nga usa sa mga nakaingon sa mga katalagman sa nasod.
“Mao gyud na’y timan-i na. Ayaw --- ayaw mo’g kumpyansa labi na gyud katong mga bukid na giagian og mga minahan. Mao nang ako, kontra gyud nako ang mining,” nagkanayon si Duterte.
Samtang si Chiong nihangyo kang Davide nga mahimong relokasyon ang Balili property sa Brgy. Inoburan. Fe Marie Dumaboc, GPL - Correspondents, Sunnex