DI tiaw ang gibating kaguol sa pamilya sa tulo ka managsuong mga dalaga nga nangamatay sa aksidente niadtong Lunes sa lungsod sa Madridejos, isla sa Bantayan, Sugbo.

Ang tulo ka mga managsuon nangalabay gikan sa motorsiklo nga ilang gisakyan hinungdan sa grabeng mga bun-og sa ilang lawas ug ulo.

Click here for stories and updates on the Sinulog 2010 Festival.

Ang mga biktima gikan ningtambong og disco ug pulos nakainom.

Sigun sa report sa kapulisan sa lungsod nga nahitabo ang aksidente niadtong Lunes pasado alas 4 sa kaadlawon.

Ang mga biktima nga nangamatay giila nga sila si Guerly, 22, dalaga, ug iyang duha ka mga igsuon nga sila si Jovelyn, 24, ug Ellen Ybañez, 17, taga brgy. Putian, lungsod sa Bantayan.

Matod sa kapulisan nga ang mga biktima padung nang mopauli gikan ning-disco sa lungsod sa Madridejos.

Ang managsuon nagsakay sa motorsiklo nga gimaniho ni Guerly.

Samtang nagsubay sila sa provincial road, sakop sa barangay Kodia sa mao nga lungsod, nabanggaan ni Guerly ang sementadong arko.

Tungod sa impact ug nakainom pa gyud, wa na niya makontrolar ang motorsiklo.

Nangabunal sila sa karsada ug nangabunal ang ilang mga ulo, hinungdan sa grabeng bun-og ug samad.

Ang tulo dali untang gidala sa Bantayan District Hospital apan pulos gideklarar nga patay nang nidangat sa tambalanan tungod sa grabeng kadaot sa ilang mga ulo ug lawas.

Samtang nasuta sa mananambal nga ang tulo pulos potibo sa ilimnong makahubog samtang nagmotorsiklo.